ބޮލީވުޑްގައި އުފެދުނު އެންމެ މޮޅު އެކްޓަރުންގެ ތެރޭގައި ހިމެނޭ ޝާހްރުކް ހާންގެ ދަރިފުޅު އާރްޔަން ޚާން ޑައިރެކްޓް ކުރި އިޝްތިހާރަކުން ޝާހު ފެނިލައިފިއެވެ.
އަމިއްލަ ސްކްރީންޕްލޭ އަކަށް ވެބް ސީރީޒެއް އުފެއްދުމުގެ މަސައްކަތް ކުރަމުން އަންނަ އާރްޔަން ހާން ޑައިރެކްޓްކުރީ އޭނާ ހިއްސާވާ އަމިއްލަ ކްލޯތިން ބްރޭންޑުގެ އިޝްތިހާރެކެވެ. މި އިޝްތިހާރުން ބައްޕަ ޝާހްރުކް ފެނިގެން ދާއިރު އެ އިޝްތިހާރަށް ގިނަ ބަޔަކު އަންނަނީ ތައުރީފް ކުރަމުންނެވެ. މި އިޝްތިހާރަކީ އާރްޔަންގެ މަސައްކަތެއް ފާޅުގައި އެންމެންނަށް ފެނުނު ފުރަތަމަ ފަހަރުވެސް މެއެވެ. "ޑި ޔަވޯލް އެކްސް" ގެ ނަމުން ނަން ދީފައިވާ މި ބްރޭންޑަކީ ލިމިޓެޑް ކަލެކްޝަން ތަކެއް ނެރޭނެ ލަގްޒަރީ ބްރޭންޑެކެވެ.
މި މަހުގެ 30 ވަނަ ދުވަހުން ފެށިގެން މި ބްރޭންޑްގެ ތަކެތި ލިބެން ހުންނާނެއެވެ. މި އިޝްތިހާރުގައި ޝާހުއާއެކު އާރްޔަން ފެނިގެން ދާއިރު ގިނަ ބަޔަކު ވަނީ އާރްޔަންގެ ފެނިލުމަށް ތައުރީފް ކޮށްފައެވެ. ބައްޕަ ޝާހު ފަދައިން އޭނާގެ ގައިގައި އެކްޓިންގެ ހުނަރު ހުރި ކަމަށްވެސް ގިނަ ބަޔަކު ބުންޏެވެ.
ނަމަވެސް މީގެ ކުރިން ޝާހު މީޑިއާތަކަށް ދިން އިންޓަވިއުއެއްގައި ބުނީ އާރްޔަން އެކްޓިން އަށް އެހާ ޝައުގުވެރިކަމެއް ނުހުންނަ ކަމަށާއި އޭނާ ބޭނުން ވަނީ މޮޅު ޑައިރެކްޓަރަކަށް ވުމަށެވެ. ޝާހްރުކް ހާންގެ އަންހެން ދަރިފުޅު ސުހާނާ ހާން ވެސް ވަނީ ދާދިފަހުން ވަނީ ދުނިޔޭގެ ނަން މަޝްހޫރު މޭކަޕް ބްރޭންޑެއް ކަމަށްވާ "މޭބްލީން"ގެ އެމްބެސަޑަރަކަށް ވެސް ވެފައެވެ. ބޮލީވުޑްގެ ރަސްގެފާނު ޝާހުގެ ހުރި ހަމައެކަނި އަންހެން ދަރިފުޅު ސުހާނާ ބޮލީވުޑަށް ނުކުންނަން ތައްޔާރުވަމުން އަންނައިރު އޭނާ އެންމެ ފުރަތަމަ ފެނިގެންދާނީ ޒޯޔާ އަހުތަރު ނެޓްފްލިކްސްއާ ގުޅިގެން ހެދި "ދި އާޗީސް" އިންނެވެ.
