ވެރިކަމުގެ ބޭނުމުގައި ރައީސް އިބްރާހީމް މުހައްމަދު ސޯލިހް ނުވަތަ އެމްޑީޕީ އާ އެކު ހަދާނެ ޑީލެއް ނެތްކަމަށް އެމްއެންޕީގެ ރައީސް ކާނަލް މުހައްމަދު ނާޒިމް ވިދާޅުވެއްޖެއެވެ،
'ނާޒިމް ބުނަނީ ކީކޭ؟' ގެ ނަމުގައި ރޭ އެމްއެންޕީ އިން ކްލަބް ހައުސްގައި ބޭއްވި އިވެންޓުގައި ކުރި ސުވާލަކަށް ޖަވާބުދެއްވަމުން ނާޒިމް ވިދާޅުވީ އެ ބޭޅުން ޖުމްހޫރީ ޕާޓީން ވަކިވެ އާ ޕާޓީއެއް ހަދަން ޖެހުނީވެސް ޖޭޕީ ސަރުކާރުގެ ކޯލިޝަނުގައި އޮންނާތީ ކަމަށެވެ. ޖޭޕީ ސަރުކާރުގެ ކޯލިޝަނުގައި އޮތުމުން ސަރުކާރުން ކިތަންމެ ބޮޑު ގޯހެއް ހެދިޔަސް އެއްޗެސް ބުނެވެން ނޯންނަކަމަށްވެސް ނާޒިމް ވަނީ ވިދާޅުވެފައެވެ.
އެމްއެންޕީ އަކީ ވަކި އުސޫލުތަކެއް ހިފަހައްޓާ ޕާޓީއެއްކަން ފާހަގަކޮށް ނާޒިމް ވިދާޅުވީ ވެރިކަމުގެ ބޭނުމުގައިވެސް ގައުމީ ބޮޑެތި މައްސަލަތަކުގައި ގައުމަށް ގެއްލުންވާނެ ފަދަ ސިޔާސަތުތަކެއްގައި ބައިވެރި ނުވާނެކަމަށެވެ. އެމްޑީޕީ އާއި އެމްއެންޕީގެ ސިޔާސަތު ތައް ދިމަނުވާކަން ހާމަކުރައްވަމުން ނާޒިމް ވިދާޅުވީ ރިޔާސީ އިންތިހާބުގައި ދެވަނަ ބުރަކަށް ހިނގައްޖެނަމަ އެ ޕާޓީގެ ސިޔާސަތާއެކީ މަސައްކަތްކުރަން ތިބި ބަޔަކާއެކު މަސައްކަތް ކުރެވިދާނެކަމަށެވެ.
މީގެ އިތުރުން ނާޒިމް ވިދާޅުވީ އެމްއެންޕީގެ ސަރުކާރެއްގައި އިސްލާމްްދީން ނޫން އެހެން ދީނަކަށް ޖާގަ ނުދެއްވާނެކަމަށެވެ، އަދި ގައުމުގެ މިނިވަންކަމާ ރައްކާތެރިކަމަށް ގެއްލުންވާނެ އެއްވެސް ކަމަކަށް ޖާގަ ނުދެއްވާނެކަމަށް ނާޒިމް ވިދާޅުވިއެވެ.
މިއަހަރު ބާއްވާ ރިޔާސީ އިންތިހާބުގައި އެމްއެންޕީގެ ރިޔާސީ ކެންޑިޑޭޓަކީ ކާނަލް ނާޒިމްއެވެ. އެ ޕާޓީއަށް މެންބަރުން އިތުރުކޮށް ރިޔާސީ އިންތިހާބަށް ތައްޔާރުވުމަށް ޕާޓީން އަންނަނީ ވަރަށް ބޮޑަށް ތައްޔާރުވަމުންނެވެ.
