ކޮންމެ މަޝްރޫއެއް އަމީނީމަގުގައި ތާރުއަޅާ އުސޫލުން ކަން ކުރުމުން އެކަމުގެ އުނދަގޫ ފަހުން ވާނީ އާންމުންނަށް ކަމަށާއި، އަމީނީމަގު ހެދުމުގެ މަސައްކަތް ސިޓީ ކައުންސިލާ ހަވާލުކޮށްފައި އޮއްވާ އެ މަސައްކަތް ނުހުއްޓުވި ނަމަ، ސިނަމާލެ ބްރިޖުގެ މަސައްކަތް ނިމުނު ފަދައިން އަމީނީމަގުގެ މަސައްކަތް ވެސް ނިމުނީސް ކަމަށް، މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މާލޭގައި އެންމެ ގިނަ ބަޔަކު ބޭނުންކުރާ އެއް މަގު ކަމަށްވާ އަމީނީމަގު ރަނގަޅު ފެންވަރަކަށް ތަރައްގީކުރުމަށް ސިޓީ ކައުންސިލުން ހަމަޖައްސާފައި ވަނިކޮށް، މިދިޔަ އޮގަސްޓު މަހު ޕްލޭނިން މިނިސްޓްރީން ވަނީ އެ މަގު ހެދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ 84 މިލިއަން ރުފިޔާ އާ ހަވާލުކޮށްފައެވެ. އެއްބަސްވުމުގައިވާ ގޮތުން އަމީނީމަގު ހަދައި ހަތް މަސް ދުވަހުގެ ތެރޭގައި ނިންމަން ޖެހެއެވެ. ނަމަވެސް އެ މުއްދަތުގައި މަގުގެ ދެބައިކުޅަ އެއްބައިގެ މަސައްކަތް އަދި މުޅިންހެން ނުނިމެއެވެ.
މިދިޔަ މަހުގެ މެދުތެރޭގައި އަމީނީމަގުގައި ތާރު އަޅަން ފަށައި އެއް ރޭ މަތިން ވަނީ ސްޓެލްކޯ އާ ހަމައަށް ތާރު އަޅައި ނިންމާލާފައެވެ. ސަރުކާރުން ވެސް، އާރުޑީސީން ވެސް ބުނީ ތާރު އެޅި ސަރަހައްދު އާންމުންނަށް އިއްޔެ ހުޅުވާލާނެ ކަމަށެވެ. ނަމަވެސް އިއްޔެ އެ ސަރަހައްދު ހުޅުވޭ ގޮތެއް ނުވިއެވެ. އަމީނީމަގުގެ މަޝްރޫއު ލަހުން ކުރިއަށްދާތީ އާންމުންގެ ފާޑުކިއުން ވަނީ ސަރުކާރަށާއި އެޗްޑީސީ އަށް އަމާޒުވެފައެވެ.
ނަމަވެސް އަމީނީމަގުގެ މަސައްކަތް ކުރިއަށް ދަނީ ރާވާފައިވާ ރޭވުމާ އެއްގޮތަށް ކަމަށާއި މުއްދަތަށް މަސައްކަތް ނިމޭނެ ކަމަށް އާރުޑީސީން އޭރު ދިޔައީ ތަކުރާރުކޮށް ބުނަމުންނެވެ. އާރުޑީސީން މިހެން ބުނަމުން ދިޔަ ނަމަވެސް، އަމީނީމަގުގެ މަސައްކަތް ތިން މަސްދުވަހުގެ މުއްދަތަކަށް ހުއްޓިފައި އޮތެވެ.
އަމީނީމަގުގެ މަޝްރޫއު އަށް އަލިއަޅުވާލައްވާ ވާހަކަ ދައްކަވަމުން މުއިއްޒު ސިފަކުރެއްވި ގޮތެއްގައި ހަތް މަސް ދުވަހުގެތެރޭ ނިންމަން ބުނި އަމީނީމަގުގެ މަސައްކަތަށް ހަ މަސްވީ އިރު، ތާރު އެޅިފައި ވަނީ "މުސައްލައެއްހާ" ތަންކޮޅެއްގައެވެ.
މުއިއްޒު ވިދާޅުވީ، މާބަނޑު އަންހެނުންނާއި އުމުރުން ދުވަސްވީ މީހުން އުޅަނދުފަހަރުގައި މާލޭގައި ދަތުރުކުރާ އިރު، މާލޭގެ ގިނަ މަގުތަކުގައި ހުންނަ އަޑިގުޑަންތަކުގެ ސަބަބުން ދިމާވެދާނެ ސިއްހީ މައްސަލަތަކާ މެދު ކަންބޮޑުވާ ކަމަށެވެ. އޭނާ ވިދާޅުވީ، ހަފްތާއަކު ތިން ދުވަހު މާލޭގެ ގޭބިސީތަކަށް ވަޑައިގަންނަވައި، އާންމުންގެ ކަންބޮޑުވުންތައް އައްސަވާ ކަމަށާއި، އެ ކަންބޮވުންތައް ސަރުކާރަށް ދަންނަވަމުންދާ ކަމަށެވެ.
މަގުތަކުގެ ވާހަކަ ދެއްކެވުމަށް ފަހު، މާލެ ރައްޔިތުންގެ ހާލަތު ދެނެގަތުމަށްޓަކައި ތިން އޮންލައިން ސާވޭ އެއް މި މަހު ހުޅުވާލާނެ ކަމަށް މުއިއްޒު ރޭ އިއުލާނުކުރެއްވިއެވެ. އެ ތިން ސާވޭއަކީ:
- މާލެ ރަށްވެހިންގެ ސާވޭ އެއް
- މާލެ ދަފުތަރުގައި ޖެހިފައިވާ މީހުންގެ ސާވޭ އެއް
- މާލޭގައި ދިރިއުޅޭ އެހެނިހެން މީހުންނަށް ހާއްސަ ސާވޭ އެއް
"އިރާދަކުރެއްވިއްޔާ އޭގެ މަންފާ ހަމަ ތިޔަ ބޭފުޅުންނަށް ފޯރާނެ. އެއީ އެ ނަތީޖާގެ މައްޗަށް ބިނާކޮށް އަޅުގަނޑުމެން ކުރިޔަށް ހިންގާ މަޝްރޫޢުތަކުން،" މުއިއްޒު ވިދާޅުވިއެވެ.
