"ފިކުރެއްގެ ދިރުން" ނަމުގައި ޕާޓީގެ ތެރެއިން ގޮފި ހެދޭނެ ކަމަށާއި، އެއީ ރިޔާސީ ކެންޑިޑޭޓާ ދެކޮޅުވުން ކަމުގައި ނުބަލާ ކަމަށް، އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދު (އިބްރޭ) ވިދާޅުވެއްޖެއެވެ.
ދާއިމީ ނަތީޖާ އާއި ރިޔާސީ ޕްރައިމަރީގެ ޝަކުވާތަކާ ގުޅޭ ތަފްސީލް ހިއްސާކުރުމަށް އެމްޑީޕީގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އިބުރޭ ވިދާޅުވީ:
- ވަގުތީ ނަތީޖާ އަށް އެއްވެސް ބަދަލެއް ނާންނަ ކަމަށް
- ޕްރައިމަރީ އަށް އަސަރު ފޯރާ ފަދަ އެއްވެސް ޝަކުވާ އެއް ނެތް ކަމަށް
މިދިޔަ ހޮނިހިރު ދުވަހު ބޭއްވި ޕްރައިމަރީގައި އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދާ ވާދަކުރައްވައި، ރައީސް އިބްރާހީމް މުހައްމަދު ސޯލިހު ވަނީ 24،572 ވޯޓު ހޯއްދަވައި ޕްރައިމަރީ ކާމިޔާބުކުރައްވާފައެވެ. ނަޝީދަށް ލިބިވަޑައިގަތީ 15،631 ވޯޓެވެ.
ޕްރައިމަރީ ނިމުނުތާ 24 ގަޑިއިރު ފަހުން ބަލި ގަބޫލުކުރައްވާ ނަޝީދު ވަނީ، "ފިކުރެއްގެ ދިރުން" ނަމުގައި ވަކި ގޮތްޕެއް އުފައްދަވަން ނިންމަވާފައިވާކަން ހާމަކުރައްވާފައެވެ. އެމަނިކުފާނު ފިކުރެއްގެ ދިރުން ގޮފި އުފައްދަވަން ނިންމަވާފައިވަނީ އެމްޑީޕީގެ ދަފްތަރުން އުނިކުރި 39 ހާސް މެންބަރުން ހިމެނޭ ގޮތަށެވެ.
އެ ގޮފި ހެދުމުގެ މަސައްކަތް ކުރަމުންދާއިރު އެ ގޮފީގެ ފަރާތުން ތާއީދުކުރާ ރިޔާސީ ކެންޑިޑޭޓެއް ފަހުން ކަނޑައަޅާނެ ކަމަށް ނަޝީދު ވިދާޅުވިއެވެ.
މިކަމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އިބްރޭ ވިދާޅުވީ، ނަޝީދަށް ގޮފި ހަދައި ޕާޓީގެ ތެރެއިން ހަރަކާތްތައް ހިންގުމުގެ ފުރުސަތު އެބައޮތް ކަމަށާއި، ޕާޓީގެ އަސާސީ ގަވައިދުގެ ދަށުން އެކަން މަނާކޮށްފައި ނުވާނެ ކަމަށެވެ. އޭނާ ވިދާޅުވި ގޮތުގައި ގޮފި ހިންގަނީ ޕާޓީގެ އަސާސީ ގަވައިދާ އެއްގޮތްވާ ގޮތުގެ މަތިންތޯ ބަލަމުން ގެންދާނެއެވެ.
"އެހެންވީމާ ގޮތްޕެއް އުފެއްދުން އަޅުގަނޑުމެން ނުބަލަން އެއީ ޕާޓީގައި މި ދެންނެވި ގޮތަށް ކެންޑިޑޭޓާ ދެކޮޅަށް ކަމެއް ކުރުން ކަމަށް. އެހެން ނަމަވެސް ގޮފި އުފައްދައިގެން ކުރާ ކަމަކުން ކަންނޭނގެ އަޅުގަނޑުމެން އެހިސާބަށް ދާނީ،" އިބުރޭ ވިދާޅުވިއެވެ.
އިބްރޭ ގަބޫލުކުރައްވާ ގޮތުގައި ޕާޓީގެ ރައީސްކަމުގައި ހުންނަވާ ނަޝީދު ޕާޓީގެ ނިޒާމަށް ގެއްލުންވާނެ ފަދަ މަސައްކަތެއް ނުކުރައްވާނެއެވެ.
އިބްރޭގެ ވާހަކަ އަށް ތާއީދުކުރައްވާ އެމްޑީޕީގެ ތަރުޖަމާނު އަނަސް އަބްދުއްސައްތާރު ވެސް ވިދާޅުވީ، ގޮފި ހެދުމަކީ އެމްޑީޕީން މަރުހަބާ ކިޔާ ކަމެއް ކަމަށާއި، ވީހާވެސް ގިނަ މެންބަރުން ވެއްދުމަކީ ޕާޓީން އެދޭ ކަމެއް ކަމަށެވެ.
"ނުކުރެވޭނެ ކަމަކީ ރަސްމީ އިންތިހާބަކަށް ގޮވާލީމަ އެމްޑީޕީގެ ޓިކެޓް ލިބިފައިވާ ފަރާތަކާ [ދެކޮޅަށް] ޕާޓީ ތެރެއިން މަސައްކަތް ނުކުރުން،" އަނަސް ވިދާޅުވިއެވެ.
ދެ ބޭފުޅުން ވެސް ވިދާޅުވި ގޮތުގައި، ހާލަތުގެ ގޮތުން ފިޔަވަޅު އަޅަން ޖެހިއްޖެ ނަމަ ޕާޓީން ފިޔަވަޅު އަޅާނެއެވެ.
މިދިޔަ ހޯމަ ދުވަހު އެމްޑީޕީގެ ވަޓްސްއަޕް ގްރޫޕަކަށް ފޮނުއްވި މެސެޖެއްގައި ނަޝީދު ވިދާޅުވި ގޮތުގައި، އެމަނިކުފާނަށް ތާއީދު ކުރައްވަން ފަސޭހަވާނީ ރިޔާސީ އިންތިހާބުގެ ކުރިއަށް ރާއްޖޭގެ ވެރިކަމުގެ ނިޒާމް ބަރުލަމާނީ އަށް ބަދަލުކުރުމަށް އެއްބަސްވާ ކެންޑިޑޭޓަކަށެވެ.
