ގޯލްޑަން ގްލޯބް އެވޯޑްސްގެ އެންމެ މޮޅު އޮރިޖިނަލް ލަވައިގެ އެވޯޑް ހޯދާފައި ވަނިކޮށް، ފިލްމު "އާރްއާރްއާރް" ގެ "ނާޓް ނާޓް" އޮސްކާ އެވޯޑަށް ވެސް ނޮމިނޭޓް ވެއްޖެއެވެ.
މިދިޔަ އަހަރު ރިލީޒްކުރި ކާމިޔާބު ފިލްމު "އާރްއާރްއާރް" ގެ ނާޓް ނާޓް އޮސްކާ އަށް ނޮމިނޭޓްވީ އެންމެ މޮޅު އޮރިޖިނަލް ލަވައަށެވެ. އެ ލަވައާއި ވާދަކުރާ ލަވަތަކަކީ "ޓެލް އިޓް ލައިކް އަ ވުމަން" ގެ "އެޕްލޯސް" އާއި ފިލްމު "ޓޮޕް ގަން: މެވެރިކް" އަށް ލޭޑީ ގާގާ އާއި ބްލަޑް ޕޮޕްގެ ހިތްގައިމު ލަވަ "ހޯލްޑް މައި ހޭންޑް" އާއި "ބްލެކް ޕެންތާ: ވަކަންޑާ ފޯއެވާ" އަށް ރިއާނާ ކިޔާފައިވާ "ލިފްޓް މި އަޕް" ގެ އިތުރުން "އެވްރީތިން އެވްރީވެއާ އޯލް އެޓް ވަންސް" ގެ "ދިސް އިޒް އަ ލައިފް" އެވެ.
95 ވަނަ އޮސްކާ އެވޯޑު ހަފްލާ އަންނަ މާޗު މަހުގެ 12 ވަނަ ދުވަހު ބާއްވާއިރު ފިލްމު "އާރްއާރްއާރް" އަކީ އެސްއެސް ރާޖްމޯލީ ޑައިރެކްޓްކޮށް އުފައްދާފައިވާ ފިލްމެކެވެ. މި ފިލްމު ވަނީ އަމިއްލަ ގޮތުން އޮސްކާގެ 15 އެވޯޑަށް ލާފައެވެ. ނަމަވެސް ނޮމިނޭޓްވީ އެންމެ އެވޯޑަކަށެވެ. އެއީ އެންމެ މޮޅު އޮރިޖިނަލް ލަވައަށެވެ. "ނާަޓް ނާޓް" ލަވައިން ފެނިގެންދަނީ އެންޓީއާރް ޖޫނިއާ އާއި ރާމް ޗަރަންގެ ފޯރިގަދަ ނެށުމެކެވެ. މި ލަވައަކީ މަޝްހޫރު ލަވަކިޔުންތެރިޔާ އެމްއެމް ކީރަވާނީ ގެ ހިތްގައިމު އަޑުން ކިޔާފައިވާ ފޯރިގަދަ ލަވައެކެވެ.
އާލިއާ ބަޓް، އަޖޭ ދޭވްގަން، އެންޓީއާރް ޖޫނިއާ އަދި ރާމް ޗަރަން މުހިއްމު ރޯލުކުޅުނު މި ފިލްމަށް ބޮކްސް އޮފީހުން ވަނީ 30 މިލިއަނަށް ވުރެ ބޮޑު އާމްދަނީ އެއް ހޯދާފައެވެ.
