އިންޑިއާ އާއި ޕާކިސްތާންގެ ޒަމާންވީ ހަތުރުވެރިކަމުގައި ހުރި ހިޔާލުތަފާތުވާ މައްސަލަތައް ހައްލުކުރުމަށްޓަކައި މަޝްވަރާ ކުރަން ބޭނުންވާ ކަމަށް ޕާކިސްތާނުން ބުނެފިއެވެ.
ޕާކިސްތާންގެ ބޮޑުވަޒީރު ޝެހްބާޒް ޝަރީފް ވިދާޅުވީ، މަޝްވަރާގެ މޭޒަށް އިންޑިއާ ގެންދިޔުމަށްޓަކައި ޔޫއޭއީން ބައިވެރިއެއްގެ ދައުރު އަދާކޮށްދޭން އެދިވަޑައިގަންނަވާ ކަމަށެވެ.
މިހާރު ޔޫއެއީއަށް ވަޑައިގެން އުޅުއްވާ ޝެހްބާޒް ވިދާޅުވީ، އިންޑިއާ އާއެކު ވާހަކަ ދައްކަން ޕާކިސްތާން އޮތީ ތައްޔާރަށް ކަމަށާއި ނަމަވެސް އެކަން ކުރުމަށް ދެގައުމު އެއްބަސް ވާން ޖެހޭނެ ކަމަށެވެ.
ޕާކިސްތާނުން އިސްވެ އިންޑިއާ އާ ވާހަކަ ދައްކަން ހުށަހެޅި އިރު ދެގައުމުގެ ދެމެދުގައި ހިޔާލުތަފާތު ވާ ވަރަށް ގިނަ މައްސަލަތައް އެބަހުއްޓެވެ. އެންމެ ބޮޑު އެއް މައްސަލައަކީ ދެގައުމުން އެބައެއްގެ އަމިއްލަ ބިމެއް ކަމުގައި ދައުވާ ކުރާ ކަޝްމީރުގެ މައްސަލައެވެ. އޭގެ އިތުރުން ދެގައުމު ހިއްސާ ކުރާ ބޯޑަރުގެ މައްސަލައާއި، އިންޑިއާއަށް ކުރިމަތިވާ ޓެރަރިސްޓުންގެ ނުރައްކާތަކުގެ މައްސަލަ ހިމެނެއެވެ.
އޭނާ ކަޝްމީރުގެ ވާހަކަ ވަކިން ފާހަގަ ކުރައްވާފައި ވާ އިރު ކަޝްމީރަކީ، އިނގިރޭސި އިސްތިއުމާރު ނިންމާ 1947 ގައި ފޭބީއްސުރެ އަދާ ޖެހެންދެންވެސް ދެފަރާތުން އެއްބަޔަކު އަނެއްބަޔަކާ ކުރިމަތިލާ ދެފަރާތުން އަމިއްލަ ކުރަން ބޭނުންވާ ތަނެކެވެ.
ދިވެހިރާއްޖެ ހިމެނޭހެން އިނގިރޭސީން މި ސަރަހައްދު އިސްތިއުމާރު ކޮށްގެން އޮތް ދުވަސް ވަރު އިންޑިއާގައިވެސް ރަސްކަން ކުރަމުން ދިޔައީ އިނގިރޭސީންނެވެ. އެމީހުން ފައިބައިގެން ދަމުން ޕާކިސްތާނާއި އިންޑިއާގެ އިން ވަކި ކޮށްލި އިރު އެ އިން ދަނީ ކަޝްމީރުގެ ތެރެއިންނެވެ. ބައެއް ދިމަ ދިމާއިން ދެފަރާތަށް ވާ ގޮތަށް ކޯރުވެސް އެބަހުއްޓެވެ. ފަރުބަދަތަކާއި ގުދުރަތީ ވަސީލަތްތައްވެސް އެބަހުއްޓެވެ.
ކުޑަކުދިން ކުޅޭ އިރު ބޮޑުބައި ހޯދަން ތަޅާ ފޮޅާ ގޮތަށް، ޕާކިސްތާނާއި އިންޑިއާވެސް ތަޅާފޮޅަނީ ކަޝްމީރު ހޯދާށެވެ.
ނިއުކްލިއާ ބާރު ލިބިފައި ވާ މި ދެގައުމުން މިހާތަނަށް 3 ހަނގުރާމައެއް ކޮށްފައި ވާ އިރު 2 ހަނގުރާމައެއް ކުރީ ކަޝްމީރުގެ މައްސަލައިގައެވެ.
މީގެ 4 އަހަރު ކުރިން، ކަޝްމީރަކީ ވަކި ސަރުކާރެއް ކަމަށް އޮތް އޮތުން، އިންޑިއާގެ ބޮޑުވަޒީރު ނަރެއްދުގަ މޯދީގެ ސަރުކާރުން ވަނީ ނިމުމަކަށް ގެނެސް އެއީ އިންޑިއާގެ މައިސަރުކާރުގެ ތަނެއްގެ ގޮތުގައި ނިންމާފައެވެ. އެއާއެކު، ކަޝްމީރުގައި ދިގުލީ ހަމނުޖެހުންތަކެއް ހިނގާ، އިންޑިއާގެ ސިފައިންނާ ކުރިމަތިލުންވެސް ހިނގާފައި ވެއެވެ.
އިންޑިއާއިން ތުހުމަތު ކުރާ ގޮތުން، އިންޑިއާ އާ ދެކޮޅަށް ކަޝްމީރުގެ ރައްޔިތުން ނުކުތުމަށް ހިތްވަރުދީ އެމީހުންނަށް ޕާކިސްތާނުން ހަތިޔާރުވެސް ފޯރުކޮށްދެއެވެ. ނަމަވެސް އެވާހަކަތައް ދޮގުކޮށް ޕާކިސްތާނުން ބުނެފައި ވަނީ، އެގައުމުން ފޯރުކޮށް ދެނީ ޑިޕްލޮމެޓިކް އެހީތެރިކަން ކަމަށެވެ. އަދި އިންޑިއާއިން ކާސްމީރުގައި އިންސާނީ ހައްގުތަކާ ހިލާފު ކަންކަން ކުރަމުން ދާ ކަަމަށް ޕާކިސްތާނުން ތުހުމަތު ކުރެއެވެ.
ޕާކިސްތާންގެ މިހުށަހެޅުމަށް އިންޑިއާއިން އަދި އެއްޗެއް ބުނެފައި ނުވާ އިރު މެދުވެރިއެއްގެ ރޯލު އަދާކުރުމާ މެދު ޔޫއޭއީންވެސް އަދި އެއްޗެއް ނުބުނެއެވެ.
