ބޮލީވުޑްގެ ސުޕަސްޓާ ޝާހްރުކް ހާން ގެ އަންހެން ދަރިފުޅު ސުހާނާ ހާން އާއި އަމީތާބް ބައްޗަން ގެ ކާފަދަރިފުޅު އަގަސްޓިއާ ނަންދާ ލޯބީގެ ގޮތުން ގުޅިގެން އުޅޭކަމުގެ އަޑުފެތުރެން ފަށައިފިއެވެ.
މިދެތަރިންގެ ލޯބީގެ ގުޅުމުގެ ވާހަކަ ތިލަވެގެން ދިޔައީ ސުހާނާ އާއި އަގަސްޓިއާ ބޮލީވުޑަށް މިތަރިން ތައާރަފްކުރާ ފިލްމު "ދި އާޗީސް" ގެ ޝޫޓިން ތެރެއިންނެވެ. މި ފިލްމަކީ ބޯނީ ކަޕޫރާއި ސްރީދޭވީގެ ހަގު ދަރިފުޅު ހުޝީ ކަޕޫރުގެ ވެސް ފުރަތަމަ ފިލްމެވެ. އަބަދުވެސް ގާތް ގުޅުމެއް އޮންނަ ސުހާނާ އާއި އަގަސްޓިއާ ލޯބީގެ ގޮތުން ގުޅުނީ ފިލްމުގެ ޝޫޓިން ތެރެއިން ކަމަށް ރިޕޯޓްތައް ބުނެއެވެ. އޭގެ ކުރިން އެކުވެރިކަމުގެ ގުޅުން އޮތް މިތަރިން އެކަކު އަނެކަކު ދެކެ ލޯބިވެވުނީ ޝޫޓިން ތެރެއިން ދެމީހުން އެއްކޮށް ގިނައިން ވަގުތު ހޭދަކޮށް އެކަކު އަނެކަކު ދަސްވާން ވަގުތު ލިބުމުން ކަމަށް ވެސް ރިޕޯޓްތައް ބުނެއެވެ.
ފިލްމުގެ ޝޫޓިން މިދިޔަ މަހު ނިމުނު ނަމަވެސް ބޭރުތެރެއިން ސުހާނާ އާއި އަގަސްޓިއާ ފެންނަލެ ގިނަ ކަމަށް ބޮލީވުޑްގެ ނޫސްތަކުން ރިޕޯޓްކޮށްފައި ވެއެވެ. އަދި ދެމީހުން ވެސް އެކަކު އަނެކަކުގެ އިންސްޓަގްރާމް ފޮޓޯތަަކަށް ކޮމެންޓްކޮށް ވެސް ހަދައެވެ. އަގަސްޓިއާ އަކީ އަމީތާބްގެ އަންހެން ދަރިފުޅު ޝްވޭތާ ބައްޗަންގެ ދަރިއެކެވެ. ސުހާނާ އަކީ ޝާހު އާއި ގޯރީ ހާންގެ ދެވަނަ ދަރިފުޅެވެ.
ދެފަރާތުގެ އާއިލާގެ ރުހުމާއެކު ސުހާނާ އާއި އަގަސްޓިއާ ޑޭޓް ކުރަމުން އަންނައިރު އަމިތާބު އާއި ޝާހްރުކް ހާން އަކީ ފެށުނީއްސުރެ ގާތް ގުޅުމެއް އޮންނަ ބައެކެވެ. ސުހާނާ އާއި އަގަސްޓިއާ ލޯބީގެ ވާހަކަ ދެކެވެމުން އަންނަ މި ދަނޑިވަޅުގައި ޝާހުގެ ދޮށީ ދަރިފުޅު އާރިއަން ހާން ގެ ލޯބީގެ ވާހަކަ ވެސް އަންނަނީ ވަރަށް ބާރަށް ދެކެވެމުންނެވެ. ރިޕޯޓްތައް ބުނާގޮތުގައި އާރްޔަން ހާން 25، ލޯބީގެ ގޮތުން ގުޅިގެން އުޅެނީ ބޮލީވުޑްގެ ނެށުންތެރިޔާ ނޯރާ ފަތެހީ 30، އާއެވެ.
