ރާއްޖޭގެ ބައެއް ސަރަހައްދުތަކުގައި ވައި ތަޣައްޔަރު ވެފައި ވާތީ ނުރައްކާތެރިކަން ކުރިމަތި ވެދާނެތީ ބޭރަށް ނިކުމެ އުޅޭ އިރު ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސް ކޮށްފިއެވެ.
އެޗްޕީއޭ އިން ބުނީ އެންވަޔަރަމަންޓް މިނިސްޓްރީގެ އައިކިޔު އެއާ ވިޝުއަލް އެޕް މެދުވެރިކޮށް މި ދުވަސްވަރު ވައި ސާފުވާނެ މިންވަރު ބެލޭނެ ކަމަށެވެ. އަދި ވައި ނުސާފުވާނެ މިންވަރު ބަލައި ބޭރަށް ނިކުމެ އުޅޭއިރު މާސްކް އަޅައިގެން އުޅުމަށް ވެސް އެޗްޕީއޭ އިން ވަނީ އިލްތިމާސް ކޮށްފައެވެ. ހާއްސަކޮށް ވައި ނުސާފުވުމުގެ ނުރައްކާތެރިކަން ތުއްތު ކުދިންނާއި ކުޑަކުދިނާއި އުމުރުން ދުވަސްވީ މީހުންނަށާއި މާބަނޑު މީހުންނާއި ފުއްޕާމޭގެ ބަލިތަކާއި ހިތުގެ ބަލިތައް އަދި އެކި އެލާޖީ މައްސަލަތައް ހުންނަ މީހުންނަށް އޮންނާނެތީ އެފަދަ މީހުން ބޭރުގައި ހޭދަ ކުރާ ވަގުތު މަދުކޮށް ބޭރަށް ދާ އިރު މާސްކް އެޅުމަށް ސަމާލު ވުމަށް އެޗްޕީއޭ އިން ބުނެއެވެ.
ވައި ނުސާފު ވަގުތުގައި ސަމާލުކަން ދޭންވީ ކަންކަމުގެ ތެރޭގައި ގޭގެ ދޮރުތައް ލައްޕާފައި ބެހެެއްޓުމާއި، ބޭރުގައި ކުޅިވަރު ކުޅުމާއި ކަސްރަތުކުރުން ފަދަ ކަންކަން މަޑުޖައްސާލުން ހިމެނެއެވެ.
މެޓް އޮފީހުން ބުނީ، ރާއްޖޭގެ އެކި ހިސާބުތަކުގައި ހޭޒް ނުވަތަ ފުސްކަން އިތުރުވެފައި ވަނީ، ހުޅަނގުން އިރުމައްޗަށް ވައި ބަދަލުވުމުން ދާތީ، އުތުރު އިންޑިއާގެ ހިމާލަޔަން ސަރަހައްދުން ހިރަފުހާއި ދުން، ވަޔާ އެކު ބޭ އޮފް ބެންގަލް ހުރަސްކޮށް ރާއްޖެއަށް ފޯރުމުން ކަމަށެވެ. އެކަމުގެ ސަބަބުން އުތުރާއި މެދުރާއްޖެތެރޭގެ އެކި ސަރަަހައްދުތަކުގައި ވައިގައި ފުސް ކަމެއް ހުންނަ ކަން ފާހަގަ ވެ ދުރު ފެންނަ މިންވަރު ވަނީ ވަރަށް ދަށަށް ގޮސްފައެވެ.
