މާލޭގައި މިނީ ބަސް ދުއްވާ ރޫޓުގައި ޕާކުކުރި 453 އުޅަނދެއްގައި ސްޓިކާ ޖަހައިފިއެވެ.
މިނީ ބަހުގެ ހިދުމަތަށް ތިން ހަފްތާ ވެފައި ވާއިރު، ފުލުހުން އާންމުކުރި ތަފާސްހިސާބުތަކުން ދައްކާ ގޮތުން މިދިޔަ ހަފްތާގެ ތެރޭގައި:
- ތިން ކާރަކާއި 32 ސައިކަލެއް ވަނީ ޓޯ ކޮށްފައި
- 453 އުޅަނދެއްގައި ސްޓިކާ ވަނީ ޖަހާފައި
ތަފާސްހިސާބުތައް އާންމު ކުރުމަށް ފަހު ކުރި ޓްވީޓެއްގައި ފުލުހުން ބުނީ، މިނީ ބަސް ދުއްވާ ރޫޓުގައި ޓްރެފިކް ބާރު ބޮޑުވާ ސަރަހައްދުތަކުގައި ދިމާވާ ޓްރެފިކްގެ މައްސަލަތައް ހައްލުކުރުމަށް އެ މަގުތަކުގައި ހަރަކާތްތެރި ވަމުން ދާނެ ކަމަށެވެ.
ހަމަ އެއާއެކު، ބަސް ރޫޓަށް ދަތިވާ ގޮތަށް ޕާކުކޮށްފައި ހުންނަ އުޅަނދުފަހަރުގައި ސްޓިކާ ޖަހާ، ޓޯ ކުރަން ޖެހޭ ހާލަތުގައި ޓޯ ކުރާނެ ކަމަށް ވެސް ފުލުހުން ބުންޏެވެ.
މި މަހުގެ 3 ގައި ފެށި މިނީ ބަހުގެ ހިދުމަތާ އެކު ޕާކުކުރުން މަނާކޮށްފައި އޮއްވާ، ފުރަތަމަ ހަފްތާގެ ތެރޭގައި އެކަނި ވެސް 538 އުޅަނދެއްގައި ސްޓިކާ ޖަހާފައި ވެއެވެ. އަދި 30 ސައިކަލަކާއި ކާރެއް ޓޯ ކުރިއެވެ.
ކޮންމެ ސްޓިކާ އަކީ 250ރ ކަމަށް ވުމުން، މި މަހުގެ މިހާތަނަށް ދެ ލައްކައަށް ވުރެ ގިނަ ރުފިޔާގެ ޖޫރިމަނާ އެއް ވަނީ ކޮށްފައެވެ.
