ބޮމުގެ އިންޒާރު ދިން މައްސަލައެއްގައި އައްޑޫ ގަން އެއާޕޯޓުން ހައްޔަރުކުރި 2 މީހުން ދޫކޮށްލައިފިއެވެ.
އެ މައްސަލައާ ގުޅިގެން ހައްޔަރުކޮށްފައިވަނީ 61 އަހަރުގެ ދިވެހި ފިރިހެނަކާއި 58 އަހަރުގެ ދިވެހި އަންހެނެކެވެ.
" ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، މި މައްސަލާގައި ހައްޔަރުކުރި 2 މީހުން ރޭގެ ވަގުތެއްގައި ދޫކޮށްލާފައިވާ ކަމަށެވެ.
ގަން އެއާޕޯޓަށް ފުރަން ގޮސް ހުރި މީހަކު، އޭނާގެ އަތުގައި ބޮމެއް އޮތް ކަމަށް ބުނި މައްސަލައެއް ރިޕޯޓުކޮށްފައިވަނީ އިއްޔެ ހަވީރު 5:25 ހާއިރު ކަމަށް ފުލުހުން ވަނީ ބުނެފައެވެ.
އެ މައުލޫމާތު ފުލުހުން ސިފައިންނާ ހިއްސާކުރި ކަމަށާއި، އެއާޕޯޓަށް ގޮސް އެ މީހުން ގެންގުޅުނު ތަކެތި ޗެކްކުރި ނަމަވެސް، ބޮމެއް ފެނިފައި ނުވާ ކަމަށް ފުލުހުން ބުންޏެވެ.
ފުލުހުން ބުނީ އެ މައްސަލަ ތަހްގީގު ކުރަމުންދާ ކަމަށެވެ.
