ސޯޝަލް މީޑިއާގައި އަމިއްލަ ބަރަހަނާ ފޮޓޯ އާންމު ކުރަމުން ގެންދާ މީހާ އަނެއްކާ ވެސް ފުލުހުން ހައްޔަރު ކޮށްފިއެވެ.
ފުލުހުން ބުނީ، އާއްމު އިޖުތިމާއީ މިންގަނޑާ ހިލާފު ފޮޓޯތަކެއް ސޯޝަލް މީޑިއާގައި އާންމު ކޮށްފައިވާ މައްސަލައެއްގައި ކޯޓު އަމުރެއްގެ ދަށުން އުމުރުން 37 އަހަރުގެ ދިވެއްސަކު ހައްޔަރުކޮށްފައިވާ ކަމަށެވެ.
މިއީ އެ ފިރިހެން މީހާ މި ފަދަ މައްސަލައެއްގައި ހައްޔަރު ކުރި ތިން ވަނަ ފަހަރެވެ. އެ ގޮތުން މިދިޔަ މަހުގެ 31 ވަނަ ދުވަހު ކޯޓު އަމުރެއްގެ ދަށުން އެމީހާ ހައްޔަރުކޮށްފައިވާ އިރު މިމަހު 2 ވަނަ ދުވަހު އޭނާ ވަނީ ދޫކޮށްލާފައެވެ.
މީގެ ކުރިން އެ މީހާ ހައްޔަރު ކޮށްފައި ވަނީ މިދިޔަ އަހަރުގެ ސެޕްޓެމްބަރު މަހުގެ 11 ވަނަ ދުވަހުއެވެ. އެފަހަރު ވެސް އެ އަަހަރުގެ އޮކްޓޯބަރު މަހުގެ 14 ވަނަ ދުވަހު ޝަރުތުތަކަކާއެކު އޭނާ ވަނީ ދޫކޮށްލާފައެވެ.
އޭނާ ހައްޔަރުކޮށްފައި ވަނީ ބަރަހަނާ ފޮޓޯ އާއްމު ކުރަމުން ދާއިރުވެސް އޭނާ ހައްޔަރު ނުކުރާތީ ފުލުހުންނާއި އަދި ސަރުކާރަށް އެތައްބައެއްގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ.
އެ މައްސަލަ ފުލުހުން ތަހުގީގު ކުރަމުން ދިޔަ ކަމަށް ބުނެފައި ވިޔަސް މި މައްސަލައާ ގުޅޭ ގޮތުން އިތުރު ތަފްސީލެއް ފުލުހުން ހާމައެއް ނުކުރެއެވެ.
