ހުޅުމާލޭގައި ރޭ ހިންގި ދެ މާރާމާރީއާ ގުޅިގެން 5 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ބުނެފިއެވެ.
ފުލުހުން ބުނީ އެ މާރާމާރީތަކާ ގުޅުންހުރި ކަމުގެ ތުހުމަތުގައި 5 މީހަކު ފުލުހުންގެ ބެލުމުގެ ދަށަށް ގެންގޮސްފައި ވަނީ ހުޅުމާލެ ފޭސް 2 އިން ކަމަށެވެ.
ރޭގެ މާރާމާރީތަކާ ގުޅިގެން ފުލުހުންގެ ހާއްސަ ޔުނިޓް، ސްޕެޝަލް އޮޕަރޭޝަން ޔުނިޓް (އެސްއޯ) ފުލުހުންގެ ފައުޖެއް ރަޔަޓް ގިއަރުގައި ފޭސް ދޭއްގެ އެޗް 12 ޓަވަރުގެ ފްލެޓަކަށް ވަނީ ވަދެ މީހަކު ހައްޔަރު ކުރިއެވެ. ރިޕޯޓުތައް ބުނާ ގޮތުން ހައްޔަރު ކުރި މީހާ ހުރީ ބޯފަޅައިގެން ގޮސްފައި ކަމުން އޭނާވެސް ހޮސްޕިޓަލަށް ގެންދިޔައެވެ. ނަމަވެސް އެއީ ކާކުކަން އަދި ސާފެއް ނުވެއެވެ.
ހުޅުމާލޭގައި ރޭ ފުރަތަމަ މާރާމާރީ ހިންގާފައި ވަނީ ހުޅުމާލެ ފޭސް އެކެއްގެ ލަޔާ ރެސްޓޯރަންޓް ކައިރީގައެވެ. އެ މާރާމާރީގެ މައުލޫމާތު ފުލުހުންނަށް ލިބުނީ ރޭ ގާތްގަނޑަކަށް 9:17 ހާއިރު ކަމަށް ބުނެއެވެ. އަދި ދެވަނަ މާރާމާރީ ހިންގައިފާ ވަނީ ހުޅުމާލެ ފޭސް ދޭ ގެ ބްރިޖް ކައިރި ކަމަށާއި އެ މާރާމާރީގެ މައުލޫމާތު ފުލުހުންނަށް ލިބުނީ ރޭ 9:32 ހާއިރު ކަމަށް ބުނެއެވެ.
އެ މާރާމާރީގައި ދެ މީހަކަށް އަނިޔާވެފައިވާ ކަމަށާއި އެ ދެ މީހުންނަށް ހޮސްޕިޓަލުގައި ފަރުވާ ދެމުން އަންނަ ކަމަށް ރޭ ފުލުހުން ވަނީ ބުނެފައެވެ. އަދި އެ މައްސަލަ ފުލުހުން އަންނަނީ އިތުރަށް ތަހުގީގު ކުރަމުންނެވެ.
