ހުޅުމާލެ ދެވަނަ ފިޔަވަހީގައި ތިން މީހަކު މާރާމާރީއެއް ހިންގައި 3 މީހުންވެސް ޒަހަމް ކޮށްލައިފިއެވެ.
ފުލުހުން ބުނީ، ދެވަނަ ފިޔަވަހީގައި މާރާމާރީއެއް ހިންގައިގެން އުޅޭ ކަމުގެ މައުލޫމާތު މިރޭ 8 ޖަހާކަން ހާއިރު ލިބިފައިވާ ކަމަށާއި، މިހާރު އެ ސަރަހައްދުގައި ހަރަކާތްތެރިވަމުންދާ ކަމަށެވެ.
ނަމަވެސް، މާރާމާރީ ހިންގި ސަބަބާއި، އަނިޔާ ލިބުނު މީހުންގެ މައުލޫމާތު އަދި ސާފެއްނޫން ކަމުގައިވެސް ފުލުހުން ބުންޏެވެ.
މާރާމާރީ ހިންގާފައިވަނީ ތިން ބިދޭސީންގެ ދެމެދުގައިކަން "ދަ ޕްރެސް" އަށް ވަނީ އެނގިފައެވެ. ލިބިފައިވާ ފޮޓޯތަކުން ފެންނަ ގޮތުގައި ތޫނު އެއްޗަކުން އެއިން ކޮންމެ މީހަކުވެސް ޒަހަމްކޮށްލާފައި ވާކަން އެނގެއެވެ. އެކަކުގެ ވާއަތުގެ ކޮނޑުހުޅުން ތިރިއަށް ރޮނގެއްހެން ކަފާލާފައި ހުރި އިރު އޭނާގެ ބުރަކަށިންވެސް ކަފާލާފައި ހުރިތަނެއް ފެންނަން ހުއްޓެވެ. ދެވަނަ މީހެއްގެ ބުރަކަށީގައި ވެސް ކަފާލާފައި ހުރިތަން ފެންނަން ހުއްޓެވެ. ތިންވަނަ މީހަކު ވެއްޓި ބިންމަތީގައި އިން އިރު އޭނާގެ އަތުގަޔާއި ބޮލުން ކޯތާފަތް މައްޗަށް ލޭފައިބާފައި ހުރިތަން ފެންނަން ހުއްޓެވެ.
ފުލުހުން ބުނީ، މި މަައްސަލަ ހިނގާފައި ވާކަމަށް މިހާރު މައުލޫމާތު ލިބެނީ ވައްކަމުގެ މައްސަލައަކާ ގުޅިގެން ކަމަށާއި، މިހާރު 3 މީހުންނަށް ހުޅުމާލެ ހޮސްޕިޓަލުގައި ފަރުވާ ދެމުން ދާ ކަމަށެވެ.
