ހަތިޔާރު އެޅި ހަނގުރާމަވެރި ތޯލިބާން ޖަމާއަތުން އަފްގާނިސްތާނުގެ ކޮންޓްރޯލް ނެގި ފަހުން އެ ގައުމުގެ ޕަބްލިކް ޔުނިވާސިޓީތަކުގެ ކިއެވުން ފުރަތަމަ ފަހަރަށް ފަށާފައި ވާ އިރު، ފިރިހެން ދަރިވަރުންނެކޭ އެއްފަދައިން، އަންހެން ދަރިވަރުންވެސް ކުލާސްތަކަށް ހާޒިރުވާ މަންޒަރު ފެންނަމުން ދާ ކަމަށް، ބައިނަލްއަގުވާމީ މީޑިއާއިން ރިޕޯޓް ކޮށްފިއެވެ.
ދީނީ ހަރުކަށި ފިކުރުގެ ޖަމައާތެއްގެ ގޮތުގައި ސިފަ ކުރަމުން އަންނަ ތޯލިބާނުންގެ ވެރިކަމުގައި އަންހެން ދަރިވަރުންނަށް ކުލާސްތަކަށް ހާޒިރުވެގެން ތައުލީމު ހާސިލު ކުރެވޭނެ "ރަސްމީ" ގަވައިދެއް އަދި އާންމު ކޮށްފައި ނުވި ނަމަވެސް، ނަންގަރުހާރް ޔުނިވާސިޓީގެ އިސްވެރިޔާ ވަނީ، އަންހެން ދަރިވަރުންނާއި ފިރިހެން ދަރިވަރުން ހާޒިރު ވާނީ ވަކި ކުލާސްތަކަކަށް ކަމަށް އިޝާރާތް ކުރައްވާފައެވެ. މިއީ އަފްގާނިސްތާނުގެ ގިނަ ޕްރޮވިންސްތަކެއްގައި މިހާރުވެސް އޮތް އުސޫލެއް ކަމަށް ހަބަރު ލިބެއެވެ.
އަފްގާނިސްތާނުގެ "ސަރުކާރުން" ހިންގާ އެންމެ ބޮޑެތި ޔުނިވާސިޓީތަކުގެ ތެރޭގައި ގުނާލެވޭ ނަންގަރުހާރް ޔުނިވާސިޓީއަށް އަންހެން ދަރިވަރުން އެތެރެވެފައި ވަނީވެސް ވަކި ދޮރޯއްޓަކުން ކަމަށް، މަންޒަރު ދުށް މީހަކާ ހަވާލާދީ، ބައިނަލްއަގުވާމީ މީޑިއާއިން ވަނީ ރިޕޯޓް ކޮށްފައެވެ.
1996 އިން 2001 އަށް އަފްގާނިސްތާނުގައި އިންތިހާ ހަރުކަށި ވެރިކަމެއް ކުރި އިރު، އަންހެނުންނާއި އަންހެން ކުދިންގެ ތައުލީމަށް، ތޯލިބާނުން ވަނީ ހުރަސް އަޅާފައެވެ. ނަމަވެސް އޯގަސްޓް 15، 2021 ގައި އަފްގާނިސްތާނުގެ ކޮންޓްރޯލް، އެ ޖަމާއަތުން އަލުން ނަގާފައި ވާއިރު، މިފަދަ ކަންކަން ބަދަލު ކޮށްފައި ވާނެ ކަމަށް ތޯލިބާނުން ދިޔައީ ބުނަމުންނެވެ.
އަންހެނުންނާއި އަންހެން ކުދިންނަށް ތައުލީމު ހާސިލު ކުރުމުގެ ފުރުސަތު ފަހިކޮށްދިނުމަކީ ބައިނަލްއަގުވާމީ މުޖުތަމައުން ތޯލިބާނުންނަށް ކުރަމުން ދާ އެންމެ ވަރުގަދަ އެއް ޑިމާންޑެވެ.
