ހަލުވި ކަމާއެކު ކޮވިޑް ފެތުރެމުންދާ މިދަނޑިވަޅުގައި މޮނިޓަރިންގެ ހާލަތަށް ގެންނަ ރަށްތަކުގެ އަދަދު އިތުރުވެއްޖެއެވެ.
އެޗްޕީއޭއިން ވަނީ މިއަދުވެސް ވަނީ ގދ. މަޑަވެލި މޮނިޓަރިންގެ ހާލަތަށް ގެނެސްފައެވެ. މޮނިޓަރިންގެ ހާލަތުގައި އެންމެ ގިނަ ދުވަސްވެފާ ވަނީ ކ.މާފުއްޓެވެ. އެ ރަށް މިދިޔަ ޑިސެންބަރު 30 ވަނަ ދުވަހު މޮނިޓަރިންގެ ހާލަތަށް ގެނެސްފައިވާއިރު، އެ ރަށުގައި ހުންނަ ޖަލުން ގިނަ އަދަދެއްގެ ގައިދީއިންނާއި އޮފިސަރުން ޕޮޒިޓިވްވެ، އެ ޖަލު ވަނީ ކުއްލި ހާލަތަށް ގެނެސްފައެވެ. އަދި ޑިސެންބަރު މަހުގެ 31 ވަނަ ދުވަހު ހއ. އިހަވަންދޫ މޮނިޓަރިންގެ ހާލަތަށް ގެނެސްފައިވާއިރު އެ ރަށުން މިހާތަނަށް 198 މީހަކު ވަނީ ޕޮޒިޓިވްވެފައެވެ.
މިއަދު އަދި އެންމެ ރަށެއް މޮނިޓަރިން އަށް ލާފައިވާ އިރު އިއްޔެ މޮނިޓަރިން އަށް ލާފައި ވަނީ ނ. ކުޑަފަރީ އާއި ގދ. ތިނަދޫއެވެ. މި މަހުގެ 22 ވަނަ ދުވަހު 7 ރަށެއް ވަނީ މޮނިޓަރިންގެ ހާލަތަށް ގެނެސްފައެވެ. އެ ރަށްރަށުގެ ތެރޭގައި ހިމެނެނީ، ބ. ގޮއިދޫ، ޅ. ކުރެންދޫ، ހދ. ކުޅުދުއްފުށީ، ލ. ދަނބިދޫ، ލ. ހިތަދޫ، ށ. ކަނޑިތީމު އަދި ވ. ކެޔޮދޫއެވެ. އަދި މި މަހު 21 ވަނަ ދުވަހު ތ. ގުރައިދޫ އަދި 20 ވަނަ ދުވަހު ހއ ދިއްދޫ ވަނީ މޮނިޓަރިންގެ ހާލަތަށް ގެނެސްފައެވެ.
މި މަހުގެ 19 ވަނަ ދުވަހު ކ. ގުރައިދޫއާއި ބ. އޭދަފުށި ވަނީ މޮނިޓަރިން ހާލަތަށް ބަދަލު ކޮށްފައެވެ. ހަމައެއާއެކު މި މަހުގެ 16 ވަނަ ދުވަހު ގދ. ގައްދޫ، ރ. އުނގޫފާރު، ހދ، ހަނިމާދޫ މޮނިޓަރިންއަށް ލާފައިވާ އިރު، މި މަހުގެ 14 ވަނަ ދުވަހު ލ. ގަން، ދ. ބަނޑިދޫ، ބ. ދަރަވަންދޫ، ށ. ފުނަދޫ އެ ލިސްޓުގައި ވަނީ ހިމަނާފައެވެ.
މީގެ އިތުރުން މޮނިޓަރިންގެ ލިސްޓުގައި ހިމަނާފައިވާ ރަށްރަށަށް ބަލާއިރު، މި މަހުގެ 9 ވަނަ ދުވަހު ހދ. ނޮޅިވަރަމްފަރު، 8 ވަނަ ދުވަހު ލ. ފޮނަދޫ ހިމެނެއެވެ.
މޮނިޓަރިންގެ ހާލަށް ނުގެންނަ ބައެއް ރަށްތަކުގައިވެސް ކޮވިޑް ފެތުރޭ ކަމުގެ މައުލޫމާތު ލިބިފައިވާއިރު އިއްޔެވެސް ރާއްޖެއިން 2484 އަށްވުރެ ގިނަ މީހުން ވަނީ އެ ބައްޔަށް ޕޮޒިޓިވްވެފައެވެ.
