ހުޅުމާލޭގެ ބެލެނިވެރި ކުންފުނި އެޗްޑީސީ އުވާލަން ޖެހޭ ކަމަށް ވިދާޅުވެ، މޭޔަރު ޑރ، މުހައްމަދު މުއިއްޒު އެޗްޑީސީއަށް ވަރަށް ބޮޑަށް ފާޑު ވިދާޅުވެއްޖެއެވެ.
އެކި ކަންކަމުގައި ސިޓީ ކައުންސިލާއި އެޗްޑީސީ އާ ދެމެދު ހިޔާލު ތަފާތުވެފައި ވަނިކޮށް، ދެ މުއައްސަސާގެ ދެމެދުގައި މައްސަލަ ގޯސްވީ އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިމަހުގެ ކުރީކޮޅު ހުޅުމާލޭގެ ދެވަނަ ފިޔަވަހީގައި ބާއްވަން އޮތް ޖަލްސާ އެޗްޑީސީގެ ހުއްދަ ނެތި ނުބޭއްވޭނެ ކަމަށް އެ ކޯޕަރޭޝަނުން އެންގުމާ ގުޅިގެންނެވެ.
އެއަށްފަހު، ސިޓީ ކައުންސިލުން ބޭއްވި ކުއްލި ބައްދަލުވުމެއްގައި، މިމަހުގެ އަށްވަނަ ދުވަހު ކައުންސިލުން ވަނީ، އެޗްޑީސީގެ ރަޖިސްޓްރީގެ ދަށުގައި އޮތް ހުޅުމާލޭގެ ބިން ކައުންސިލްގެ ދަށަށް ބަދަލުކުރުމަށް ނިންމައި، އެޗްޑީސީގެ އަތުން ރަޖިސްޓްރީ ނަގާފައެވެ. ނަމަވެސް، ކައުންސިލްގެ ނިންމުމަށް އަމަލުކުރުން ފަސްކޮށްދިނުމަށް އެދި އެޗްޑީސީން އެ މައްސަލަ ސިވިލް ކޯޓަށް ހުށަހެޅުމުން، ކައުންސިލްގެ އެ ނިންމުމަށް އަމަލުކުރުން ފަސްކުރުމަށް ސިވިލް ކޯޓުން ވަނީ ހުކުމްކޮށްފައެވެ.
އޭގެ ދުވަސްތަކެއް ފަހުން، ކައުންސިލުން ވަނީ މި މައްސަލަ ހައިކޯޓުގައި އިސްތިއުނާފު ކުރަން ނިންމާފައިވާ ކަން ހާމަކޮށް މީޑިއާތަކަށް މައުލޫމާތު ދީފައެވެ.
ދެ މުއައްސަސާގެ ދެމެދުގައި މައްސަލަ ހޫނުވެފައި ވަނިކޮށް މުއިއްޒު ކުރެއްވި ޓްވީޓެއްގައި ވިދާޅުވީ، މާލޭގެ ރައްޔިތުންގެ ހައްގުތަކުގެ ހުރަހަކަށް އެޗްޑީސީ ވެފައިވާ ކަމަށާއި، އެޗްޑީސީ އުވާލައި، މާލޭގެ އިހްތިސާސްގެ ތެރޭގައި ހިމެނޭ ސަރަހައްދަކީ ކައުންސިލުން ބަލަހައްޓާ ތަނަކަށް ވާން ޖެހޭ ކަމަށެވެ.
"މާލޭގެ ރައްޔިތުންގެ ހައްގުގައި އެޗްޑީސީ އުވާލަން މިހާރު އެބަޖެހޭ. މާލޭ ރައްޔިތުންގެ ހައްގުތަކަށް އޮތް ހުރަހަކަށް އެޗްޑީސީ ވަނީ މިހާރު ވެފައި." މުއިއްޒު ވިދާޅުވިއެވެ.
އެޗްޑީސީ އާއި ކައުންސިލާ ދެމެދު މައްސަލަ ގޯސްވެފައި ވާއިރު، މީގެ ކުރިން ކައުންސިލުން ހުޅުމާލޭގައި ބޭއްވި އަވަށު ބައްދަލުވުމުގައި، 1،800 މީހުންގެ ސޮޔާއެކު ކައުންސިލްގެ ދަށަށް ހުޅުމާލެ ބަދަލުކުރުމަށް ޕެޓިޝަނެއްވެސް ހުށަހަޅާފައި ވެއެވެ.
މުއިއްޒަށް ހުޅުމާލޭގެ ބިންތައް ރަނަށްވުރެން އަގުބޮޑެވެ. ވެއިޓު ލިސްޓްގައި ތިބި މީހުންނަށް ކޮންމެހެންވެސް ކުރިން ދައުރުގައި ބެހިގޮތަށް ބިންތައް ބަހާލަން އެބަޖެހެއެވެ. މޭޔަރުކަމަށް އައީ މިބޭނުމުގައެވެ.