ދެކުނު އޭޝިއާގެ ގައުމުތަކުން ރާއްޖެއަށް ދަތުރުކުރާ ވާކް ޕާމިޓް ހޯލްޑަރުން ރާއްޖެ އެތެރެވުމަށް ފަހު އެޗްޕީއޭ އިން ކަނޑައަޅާ ފެސިލިޓީއެއްގައި ކަރަންޓީންވާން އެންގި އެންގުމަށް ބަދަލު ގެނެސްފިއެވެ.
އެޗްޕީއޭއިން ކުރި އިއުލާނެއްގައި ބުނީ ދެކުނު އޭޝިއާ ޤައުމުތަކުން ވޯކްޕާމިޓް ހޯލްޑަރުން ރާއްޖެ އެތެރެވުމަށްފަހު އެޗްޕީއޭއިން ކަނޑައަޅާ ފެސިލިޓީއެއްގައި ކަރަންޓީނުވުމަށް ކަނޑައަޅާފައިވާ ކަނޑައެޅުން އުވާލާފައިވާ ކަމަށެވެ.
މި ގޮތަށް ނިންމުމާ ގުޅިގެން، ކަނޑައެޅިފައިވާ ގޮތުގެ މަތިން ކޮވިޑް-19 ވެކްސިން ފުރިހަމަ ނުވާ، ރާއްޖެއަށް އެތެރެވާ ވޯކް ޕާމިޓް ހޯލްޑަރުން ރާއްޖެ އެތެރެވުމަށް ފަހު، އެމީހަކު ރާއްޖެއަށް ގެންނަ ފަރާތުން ކަނޑައަޅާ ތަނެއްގައި ކަރަންޓީނުވާން ޖެހޭނެ ކަމަށް އެޗްޕީއޭއިން ބުނެއެވެ.
ކަރަންޓީނުން ދޫކޮށްލެވޭނީ، 14 ދުވަސް ހަމަވުމުން، ކޮވިޑު-19 އަށް ޓެސްޓް ހަދައި، އެ ޓެސްޓް ގެ ނަތީޖާ ނެގެޓިވް ވުމުން ކަމަށް ވެސް އެޗްޕީއޭއިން ވަނީ ބުނެއެވެ.
އެޗްޕީއޭއިން އިތުރަށް ބުނީ ރާއްޖެއަށް އަންނަ ވޯކް ޕާމިޓް ހޯލްޑަރުން ރާއްޖެއަށް އައުމުގެ މަދުވެގެން އެއް ދުވަސް ކުރިން ކަރަންޓީނުވާ ތަނުގެ މައުލޫމާތު އެޗްޕީއޭ އަށް އަންގަން ޖެހޭނެ ކަމަށެވެ.
