ދެ އަހަރަށް ފަހު ދަރްމެޓިކް އެންޓަޓެއިންމަންޓާއި ނެޓްފްލިކްސްގެ އެއްބަސްވުން ނިމުމަކަށް އައިސްފިއެވެ.
ކަރަން ޖޯހަރާއި އަޕްރޫވާ މެހެތާގެ ދަރްމެޓިކް އެންޓަޓެއިންމަންޓާއެކު 2019 ވަނަ އަހަރު ނެޓްފްލިކްސުން ވެފައިވާ އެއްބަސްވުމުގައި ވާ ގޮތުން ނެޓްފްލިކްސްއަށް ދަރްމެޓިކް އެންޓަޓެއިންމަންޓުން ފިކްޝަން އަދި ނޮން ފިކްޝަން ފިލްމުތަކާއި ސީރީޒްތައް އުފައްދައި ދޭން ޖެހެއެވެ.
ދަރްމެޓިކް އެންޓަޓެއިންމަންޓުން މިހާތަނަށް ނެރެފައިވާ ޕްރޮޖެކްޓްތަކުގެ ތެރޭގައި ދާދިފަހުން ނެރުނު "އަޖީބް ދާސްތާން" ގެ އިތުރުން "ގިލްޓީ" އަދި "ސާޗިންގް ފޯ ޝީލާ" ހިމެނެއެވެ. މި އެއްބަސްވުން އުވާލިކަން އިއުލާނު ކޮށްފައި ވާއިރު އެއްބަސްވުން އުވާލި ނަމަވެސް މިހާރު އެއްބަސްވެފައިވާ ޕްރޮޖެކްޓްތަކުގެ މަސައްކަތް ދަރްމެޓިކް އެންޓަޓެއިންމަންޓުން ކުރާނެއެވެ.
މީޑިއާ ރިޕޯޓުތައް ބުނާގޮތުން މިގޮތުން ކުރިއަށް އޮތް ދެ އަހަރެއްހާ ދުވަހުގެ ތެރޭގައި ނިންމަން ޖެހޭ ގިނަ މަސައްކަތް އަދި ނުނިމި އެބަހުއްޓެވެ.
މީގެ އިތުރުން ބައެއް ޝޯތަކުގެ ދެ ވަނަ ސީޒަނެއް ގެނައުމަށް ވެސް ނިންމާފައި ވެއެވެ. އޭގެތެރޭގައި ހިމެނޭ "ފެބިއުލަސް ލައިވްސް އޮފް ބޮލީވުޑް ވައިވްސް" އަކީ ގިނަ ބައެއްގެ ތަރުހީބު ލިބިގެން ދިޔަ ޝޯއެކެވެ.
އެއްބަސްވުން އުވާލާފައި ވާއިރު އޭގެ ސަބަބެއް ދެ ފަރާތުން ވެސް ހާމަކޮށްފައެއް ނުވެއެވެ.
