މާލޭ، ހުޅުލެ އަދި ހުޅުމާލެ ގުޅޭ ބުރިޖް އިން ހުޅުމާލެއަށް އަރާ ފަޅިން ދުއްވަމުން ދިޔަ ކާރެއް ކޮންޓްރޯލް ނުވެ، އެއާޕޯޓު ފެންސް ފަޅާލައި ކާރު މޫދަށް އަރިއަޅާލައިފިއެވެ.
މިކަމާ ގުޅިގެން ފުލުހުން ބުނީ ހުޅުމާލެ އެމްޑަބްލިއުއެސްސީ ސައިޓާ ދިމާ ހައިވޭއިން ދުއްވައިފާ ދިޔަ ކާރެއް އެ މަގުގެ އަރިމަތީގައި ޖަހާފައިވާ ގަސްތަކުގައިޖެހި ޕޭވްމަންޓް އަށް އެރުމުން ނައްޓާލަން އުޅުމުގެ ތެރޭގައި ކޮންޓްރޯލް ނުވެގޮސް އެއާޕޯޓު ފެންސްގައި ޖެހި އެކްސިޑެންޓްވެފައިވާ ކަމަށެވެ.
މި މައުލޫމާތު ފުލުހުންނަށް ލިބިފައިވަނީ މިއަދު ގާތްގަނޑަކަށް 15:35 ހާއިރު ކަމަށް ފުލުހުން ބުނެއެވެ.
މި އެކްސިޑެންގައި އެއްވެސް މީހަކަށް އަނިޔާވެފައެއް ނުވެއެވެ. އެހެން ނަމަވެސް މި އެކްސިޑެންޓާ ގުޅިގެން ބަލަންޖެހޭ ކަންކަން ބަލަމުންދާ ކަމަށް ފުލުހުން މައުލޫމާތުދެއެވެ.
