މާލެ ސަރަހައްދުގައި "ސްޓެޕް ސާވޭ" އަލުން ފަށަން ނިންމައިފިއެވެ.
ހެލްތް ޕްރޮޓެކްޝަން އެޖެންސީ އެޗްޕީއޭއިން ބުނީ ދިރިއުޅުމުގެ ވައްޓަފާޅިއާ ގުޅިފައިވާ ދިގު މުއްދަތަކަށް ބޭސް ފަރުވާ ކުރަންޖެހޭ ބަލިތައް ނުވަތަ ގައިން ގަޔަށް ނާރާ ބަލިތައް ޖެހުމަށް މެދުވެރިވާ ހިރާސްތައް ރާއްޖޭގައި ހުރި މިންވަރު ދެނެގަތުމަށް ހިންގާ ސާވޭއެއް ކަމަށެވެ. އަދި ރާއްޖޭގެ ހުރިހާ ސަރަހައްދެއް ތަމްސީލުވާ ގޮތަށް މި ދިޔަ އަހަރު ކުރަން ފަށާފައިވާ ދިރާސާ "ސްޓެޕް ސާވޭ" މާލެ ސަރަހައްދުގައި ފެށުމަށް ފަހު ކޮވިޑް-19 ގެ ހާލަތާ ގުޅިގެން މެދުކަނޑާލާފައިވާ ކަމަށް ވެސް އެޗްޕީއޭއިން ވަނީ ބުނެފައެވެ.
އެ ސާވޭ މިއަހަރު ނިންމުމުގެ ގޮތުން މިމަހުގެ 10 ވަނަ ދުވަހުން ފެށިގެން މާލެ އަދި ހުޅުމާލޭގައި އެދިރާސާގެ މަސައްކަތްތައް އަލުން ކުރިޔަށްދާނެ ކަމަށް އެޗްޕީއޭއިން ބުނެއެވެ.
މިއީ އެޗްޕީއޭއިން އިސްނަގައިގެން ދުނިޔޭގެ ސިއްހަތު ޖަމިއްޔާ އާއި މޯލްޑިވްސް ނެޝަނަލް ޔުނިވާސިޓީ ގުޅިގެން ކުރިޔަށް ގެންދާ މަސައްކަތެއް ކަމަށް އެޗްޕީއޭއިން ބުނެއެވެ.
އެ ސާވޭ ކުރުމަށް ގުރުއަތުން ނެގިފައިވާ ގޭގެއަށް މައުލޫމާތު އެއްކުރުމަށް ޒިޔާރަތްކުރާނެ ކަމަށް އެޗްޕީއެއިން ބުނެއެވެ. އެޗްޕީއޭއިން ބުނީ އެ ސާވޭގެ މަސައްކަތުގައި ހަރަކާތްތެރިވާ ފަރާތްތައް ތިބޭނީ މޯލްޑިވްސް ނެޝަނަލް ޔުނިވާސިޓީއިން އެކަމަށް ދޫކޮށްފައިވާ ފާހެއް އަޅައިގެން ކަމަށެވެ.
އެ ސާވޭ ކުރިޔަށް ގެންދިއުމަށް އެންމެންގެ އެއްބާރުލުމާ އެހީތެރިކަން ދިނުމަށް އެޗްޕީއޭއިން ވަނީ އެދިފައެވެ.
