ދެ ބިލިއަން ރުފިޔާގެ ޓްރެޝަރީ ބިލް (ޓީ-ބިލް) ވިއްކުމަށް ފިނޭންސް މިނިސްޓްރީން މިއަދު ހުޅުވާލައިފިއެވެ.
މިނިސްޓްރީން ވިއްކަން ހުޅުވާލާފައިވަނީ ޖުމްލަ 2.02 ބިލިއަން ރުފިޔާގެ ޓީބިލެވެ. އެއިން 40 މިލިއަން ރުފިޔާގެ ޓިބިލަކީ 28 ދުވަހުގެ ތެރޭގައި އަނބުރާ ދައްކާ ގޮތަށް ވިއްކަން ހުޅުވައިލި ޓީބިލެވެ. އަދި 98 ދުވަހުން އަނބުރާ ދައްކާ ގޮތަށް 240 މިލިއަން ރުފިޔާގެ ޓީބިލެކެވެ.
މިއޭގެ އިތުރުން 182 ދުވަހުން އަނބުރާ ދައްކާ ގޮތަށް 135 މިލިއަން ރުފިޔާގެ ޓީބިލަކާއި 365 ދުވަހުން އަނބުރާ ދައްކާ ގޮތަށް ވިއްކާ 1.6 ބިލިއަން ރުފިޔާގެ ޓީބިލު ވިއްކަން ވަނީ ހުޅުވާލާފައެވެ.
މި ޓީބިލުތަކުގެ އިންޓަރެސްޓު ރޭޓެއްގެ ގޮތުގައި 3.50 ޕަސަންޓާއި 4.60 ޕަސަންޓާއާ ދެމެދުގެ މިންވަރެއް ކަނޑައަޅާފައިވާއިރު އެއް މަސް ދުވަހުގެ ޓީ ބިލު ވިއްކަނީ 3.50 ގެ އިންޓަރެސްޓު ރޭޓުގައެވެ.
ހަމައެހެންމެ ތިން މަސް ދުވަހަށް ވިއްކާ ޓީބިލު 3.87 ޕަސަންޓުގައި ވިއްކާއިރު ހަ މަހުގެ ޓީބިލެއް ވިއްކަނީ 4.23 ޕަސަންޓުގައެވެ. އަދި އެއް އަހަރު ދުވަހުގެ ޓީބިލެއް ވިއްކަނީ 4.6 ޕަސަންޓް އިންޓަރެސްޓު ރޭޓުގައެވެ.
މިއީ މި މަހުގެ ތެރޭގައި ޓީބިލް ވިއްކާ ދެވަނަ ފަހަރެވެ. އެގޮތުން މި މަހުގެ އެއްވަނަ ދުވަހު 2.6 ބިލިއަން ރުފިޔާގެ ޓީބިލް ވިއްކަން ހުޅުވާލިއެވެ.
