މާލޭ ސިޓީގެ ތަރައްގީ ޕްލޭނަށް ރައްޔިތުންގެ ހިޔާލު ހޯދުމުގެ ބައްދަލުވުންތައް ސިޓީ ކައުންސިލުން ފަށައިފިއެވެ.

މި ބައްދަލުވުންތަކުގައި ތަރައްގީގެ ޕްލޭނަށް ހިޔާލު ހޯދުމުގެ އިތުރުން ފައިނޭންޝަލް ޕްލޭނާއި އަންނަ އަހަރަށް ލަފާކުރާ ބަޖެޓަށް އަދި އެކްޝަން ޕްލޭނަށް ހިޔާލު ހޯދުމުގެ ކަންކަން ވެސް ކުރިޔަށްދާނެ ކަމަށް ސިޓީ ކައުންސިލުން ބުނެއެވެ.

ސިޓީ ކައުންސިލުން ބުނީ މި ބައްދަލުވުންތައް ކުރިޔަށް ގެންދާނީ މާލޭ ސިޓީގެ އަވަށްތައް ވަކިވަކިން އެޗްޕީއޭގެ ގައިޑްލައިންއާ އެއްގޮތައް ކަމަށެވެ. އަދި ފުރަތަމަ ބައްދަލުވުން ގަލޮޅު އަވަށުގައި އޮގަސްޓް 5، 2021 ވަނަ ދުވަހުގެ ރޭ ބާއްވާފައި ވާކަމަށް ވެސް ސިޓީކައުންސިލުން ބުނެއެވެ.

މި ބައްދަލުވުމުގައި މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވަނީ ކައުންސިލްގެ ޕްލޭނާއި 2022 ވަނަ އަހަރުގެ ބަޖެޓް ހުށަހަޅުއްވައި ދެއްވާފައެވެ. އަދި ހިނގަމުންދާ ބަޖެޓުން ކުރެވިފައިވާ މުހިންމު ކަންކަމާ ހިނގަމުންދާ ބައެއް މަޝްރޫއުތައް ވެސް ވަނީ ތަފްސީލުކޮށް ދެއްވާފައެވެ.

ސިޓީ ކައުންސިލުން ބުނީ މި ބައްދަލުވުމުގައި ގަލޮޅުގެ ގިނަ އަދަދެއްގެ ރައިްޔިތުން ބައިވެރިވެފައި ވާކަމަށެވެ. އަދި ކައުންސިލްގެ މަސައްކަތްތަކާ ބެހޭގޮތުންނާއި އެކިއެކި ކަންކަމާމެދު ދެކޭގޮތް މި ބައްދަލުވުމުގައި ވަނީ ހުށަހަޅާފައެވެ.

މި ބައްދަލުވުމުގައި މޭޔަރުގެ އިތުރުން ގަލޮޅު އުތުރު ދާއިރާގެ މެންބަރު މުހައްމަދު ސައިފް ވެސް ވަނީ މި ބައްދަލުވުމުގައި ބައިވެރިވެ ރައްޔިތުންނާ ވާހަކަދައްކަވާފައެވެ. މީގެ އިތުރުން ސިޓީ ކައުންސިލްގެ ކައުންސިލް މެންބަރުންނާ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާ ސިޓީ ކައުންސިލްގެ ސެކްޝަންތަކުގެ މުވައްޒަފުން ވެސް ވަނީ މި ބައްދަލުވުމުގައި ބައިވެރިވެފައެވެ.

އަދި ޕްލޭން ހެދުމުގެ ދެ ތަޖުރިބާކާރުންނާ އެބޭފުޅުންގެ ފަންނީ ލަފާ ހިލޭ ސާބަހަށް ސިޓީ ކައުންސިލަށް ދެއްވުމުގެ އިތުރުން މި ބައްދަލުވުމުގައި ވަނީ ބައިވެރިވަޑައިގެންފައެވެ.

ބައްދަލުވުން ތާވަލު ކުރެވިފައިވާ ގޮތުން ދެން އެންމެ އަވަހަށް އޮންނާނީ ވިލިމާލޭގެ ބައްދަލުވުން ކަމަށް ސިޓީ ކައުންސިލުން ބުނެއެވެ. އަދި މި ބައްދަލުވުން އޮންނާނީ މިމަހުގެ 8 ވަނަ ދުވަހުގެ ރޭ 08:30 ގައި ވިލިމާލޭ ބަނދަރުގައި ކަމަށް ވެސް ސިޓީ ކައުންސިލުން ބުނެއެވެ.

މައްޗަންގޯޅީގެ ބައްދަލުވުން އޮންނާނީ 10 ވަނަ ދުވަހުގެރޭ 08:30 ގައި މާފަންނު ސްޓޭޑިއަމްގެ ޓާފް ދަނޑުގައެވެ. އަދި މާފަންނު ބައްދަލުވުން އޮންނާނީ 12 ވަނަ ދުވަހުގެރޭ 08:30 ގައި ރަސްފަންނު ސަރަހައްދުގައި ކަމަށާ ހެންވޭރު ބައްދަލުވުން އޮންނާނީ 14 ވަނަ ދުވަހުގެރޭ 08:30 ގައި ލޮނުޒިޔާރަތް ޕާކުގައި ކަމަށް ވެސް ސިޓީކައުންސިލުން ބުނެއެވެ. މީގެ އިތުރުން ހުޅުމާލޭ ބައްދަލުވުން އޮންނާނީ 22 ވަނަ ދުވަހުގެރޭ 08:30 ގައި ކަމަށް ސިޓީ ކައުންސިލުން ބުނެއެވެ.

ހަބަރު މާލެ ސިޓީ ކައުންސިލް މާލެ ސިޓީ މޭޔަރު