ރެޑްވޭވް ފިހާރައަކުން ސެންޓްފުޅިއެއް ވަގަށް ނަގައިގެން ނިކުންނަން އުޅުނު މީހަކު 18،000 ރުފިޔާއިން ޖޫރިމަނާ ކޮށްފިއެވެ.
ނޮވެމްބަރު 25، 2017 ގައި މަޖީދީ މަގު ގަލޮޅު ދަނޑުގެ ތިރީގައި ހިންގާ ރެޑްވޭޭވް ފިހާރަ އިން ސެންޓުފުޅިއެއް ޖިންސުގެ ތެރެއަށް ލައި ފޮރުވައިގެން، އޭގެ އަގު ނުދައްކާ ނުކުންނަން އުޅުނު މީހަކު އޭރު ހުއްޓުވިއެވެ.
އެމައްސަލާގައި އޭނާގެ މައްޗަށް އުފުލީ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއެވެ.
އެމީހާ ވަނީ އެ ސެންޓުފުޅި ހިފައިގެން ފިހާރަ އިން ނުކުންނަން އުޅުނު ކަމަށް ކްރިމިނަލް ކޯޓުގެ ޝަރީއަތުގެ މަޖިލީހުގައި އެއްބަސްވެސް ވެފައެވެ. އަދި ވީހާވެސް ކުޑަ އަދަބެއް ދިނުމަށް ޝަރީއަތުގެ މަޖިލީހުގައި އޭނާ އެދުނެއެވެ.
މިހާރު ވެސް އެހެން މައްސަލައެއްގައި ޖަލުގައި ހުކުމް ތަންފީޒުކުރަމުން އަންނަ އިރު އޭނާގެ މައްޗަށް ކޮށްފައިވާ ހުކުމުގައި ބާކީ އޮތީ 16 ދުވަހެއެވެ.
އެހެންކަމުން އެމިހާ ވަނީ އެ މައްސަލައިގައި އޭނާގެ އަދަބު ޖޫރިމަނާ އަށް ބަދަލުކޮށްދޭން އެދިފައެވެ. އަދި ޖޫރިމަނާގެ ފައިސާ ހަ މަސް ދުވަހުގެ ތެރޭގައި ދެއްކޭނެ ކަމަށް އޭނާ ކޯޓުގައި ވަނީ ބުނެފައެވެ.
އެހެންވެ، އެ މީހާ 18،000ރ. އިން ޖޫރިމަނާކޮށް، އެ ފައިސާ ހަ މަސް ދުވަހުގެ ތެރޭގައި މީރާ އަށް ދެއްކުމަށް އަންގާ ވަނީ ހުކުމް ކޮށްފައެވެ.
