ހިޔާ ފްލެޓްތައް ލިބުނު ފަރާތްތަކުގެ ހައްގުތައް ހޯދުމަށް ވަކާލާތުކޮށް، އަޑު އުފުލުމަށް ވައިބާ މެދުވެރިކޮށް ހަދާފައިވާ "ހިޔާ ޔޫނިއަން" ގްރޫޕުގެ އާދޭސްތަކަށް އިޖާބަ ދެއްވުމަށް، ސަރުކާރަށާއި ހައުސިންގް ޑިވެލޮޕްމަންޓް ކޯޕަރޭޝަނަށް މާލޭ ސިޓީގެ މޭޔާ ޑރ.މުހައްމަދު މުއިއްޒު ގޮވާލައްވައިފިއެވެ.
ހިޔާ ފްލެޓްތައް ބިނާކުރި ދުވަސްވަރު ހައުސިންގް މިނިސްޓަރު އަކަށް ހުންނެވި މޭޔާ މުއިއްޒު މިކަމަށް ގޮވާލެއްވީ، ހިޔާ ޔޫނިއަންގެ އަޑު އެއްސެވުމަށްފަހު އެމަނިކުފާނު ރޭ ކުރެއްވި ޓްވީޓެއްގައެވެ.
މުއިއްޒު ވިދާޅުވެފައިވަނީ ހިޔާ ޔޫނިއަންގެ އާދޭސް އަޑުއެއްސެވުމަކީ ސަރުކާރާއި އެޗްޑީސީ އިން ކުރަން ޖެހޭނެ ކަމެއް ކަމަށެވެ. އެ މައްސަލައިގައި ސިޔާސީ ފިކުރު އެއްކިބާ ކުރަންޖެހޭނެ ކަމަށާއި ރައްޔިތުންގެ އަޑު އަހަން ޖެހޭނެ ކަމަށް މުއިއްޒު ވިދާޅުވިއެވެ.
މުއިއްޒު ކުރިން ވިދާޅުވެފައިވަނީ ހިޔާ ފްލެޓްތަކުގެ އަގު 5600 ރުފިޔާއަށް ތިރިކުރެވޭނެ ކަމަށް ހިސާބުތަކުން ދައްކާ ކަމަށެވެ. އަދި އެ އަގަށް ހިޔާ ފްލެޓްތަކުގެ އަގު ކުޑަކުރުމަށް ސަރުކާރާއި އެޗްޑީސީއަށް މުއިއްޒު ވަނީ މޭޔާގެ ހައިސިއްޔަތުން ސިޓީ ފޮނުއްވާފައެވެ. ސަރުކާރުން ކަނޑައަޅާފައިވާ އަގަކީ މަހަކު 8500 ރުފިޔާއެވެ. މުއިއްޒު ވިދާޅުވެފައިވަނީ އެ އަގަކީ ހަގީގީ އަގު ނޫން ކަމަށެވެ.
ހިޔާ ކޮމިއުނިޓީން ވަނީ އިއްޔެ މެންދުރުފަހު 02:00ގައި "އެންމެ ފަހުގެ އާދޭސް" ގެ ނަމުގައި ހިމޭން އިހްތިޖާޖެއް ވެސް ފަށާފައެވެ. އަދި "އަޑުއަހާށޭ އަޑު އިވޭހޭ ރައްޔިތުން އަޑު"، "ނިކަމެތި ރައްޔިތުން ނިކަމެތިވާނީ ރައްޔިތުން" އެ ހޭޝްޓެގް ދަނީ ބޭނުންކުރަމުންނެވެ.
މި އިހްތިޖާޖް މިރޭ 12:00 ހަމައަށް ކުރިއަށް ގެންދާގޮތަށް ވަނީ ހަމަޖައްސާފައެވެ.
