ފިނޭންސް މިނިސްޓްރީން ކުންފުނިތައް ގިންތިކޮށް ޕާފޯމަންސް ބަލަން ގެނައި ބަދަލާއެކު، ސަރުކާރު ހިއްސާވާ ކުންފުނިތަކުގެ މެނޭޖިން ޑިރެކްޓަރު (އެމްޑީ) އާއި ޑެޕިއުޓީ މެނޭޖިން ޑިރެކްޓަރު (ޑީއެމްޑީ) އިން ގެ މުސާރަ ބޮޑުވެއްޖެއެވެ.
ސަރުކާރު ހިއްސާވާ ކުންފުނިތައް ހިންގުމުގައި އެންމެ އިސް ދައުރެއް އަދާކުރާ އެމްޑީ އާއި ޑީއެމްޑީގެ މުސާރަ ބޮޑުވެފައިވާކަން އެނގުނީ ފިނޭންސް މިނިސްޓްރީން ސަރުކާރު ހިއްސާވާ ކުންފުނިތައް ކެޓަގަރައިޒް ކުރުމާއި މެނޭޖިން ޑިރެކްޓަރުންނާއި ޗެއާމަން އަދި ބޯޑު މެންބަރުގެ އިނާޔަތްތައް ފިނޭންސް މިނިސްޓްރީން މުރާޖާ ކުރުމާ ގުޅިގެންނެވެ.
މި ބަދަލާއެކު ކެޓަގައިޒް ކޮށްފައިވާ ސަރުކާރު ކުންފުނިތަކުގެ އެންމެ ދަށް ކެޓަގަރީގެ ކުންފުންޏެއްގެ އެމްޑީގެ މިހާރުގެ މުސާރަ އަށް އެވްރެޖުކޮށް 10،000ރުފިޔާއި 15،000 ރުފިޔަށް ގެ އިތުރުވުމެއް އަންނާނެއެވެ.
އަލަށް އެކުލަވާލި އުސޫލުގައިވާ ގޮތުން ޔުޓިލިޓީ ކުންފުނިތަކުގެ ތެރެއިން 111 ރަށަށް ވުރެ ގިނަ ރަށުގައި ކުންފުނީގެ ގޮފިތަށް ހިންގަމުންދާ ކުންފުނިތަކަށް "ހާޑްޝިޕް އެލަވަންސް" ގެ ގޮތުގައި ކުންފުނީގެ މެނޭޖިން ޑިރެކްޓަރަށް ކޮންމެ މަހަކު 16،000 ރުފިޔާ ދެވިދާނެއެވެ.
އަދި ކުންފުނީގެ ޑެޕިއުޓީ މެނޭޖިން ޑިރެކްޓަރަށް މި އެލަވަންސްގެ ގޮތުގައި ކޮންމެ މަހަކު 12،800 ރުފިޔާ ދެވިދާނެއެވެ. އަދި އިޖުތިމާއީ ރައްކާތެރިކަމުގެ ހިދުމަތްދޭ ކުންފުނިތަކަށް "އިޖުތިމާއީ ރައްކާތެރިކަމުގެ ހާއްސަ އެލަވަންސް" ގެ ގޮތުގައި ކުންފުނީގެ މެނޭޖިން ޑިރެކްޓަރަށް ކޮންމެ މަހަކު 12،300 ރުފިޔާ ދެވިދާނެއެވެ. އަދި ކުންފުނީގެ ޑެޕިއުޓީ މެނޭޖިން ޑިރެކްޓަރަށް މި އެލަވަންސްގެ ގޮތުގައި ކޮންމެ މަހަކު 9،840 ރުފިޔާ ދެވިދާނެ އެވެ.
ނަމަވެސް، "ހާޑްޝިޕް އެލަވަންސާ" އިޖުތިމާއީ ރައްކާތެރިކަމުގެ ހާއްސަ އެލަވަންސް ކުންފުނީގެ ބޯޑުން ފާސްކޮށް ހަމަޖެއްސުމުގެ ކުރިން މިނިސްޓްރީ އޮފް ފިނޭންސް ގެ ހުއްދަ ލިޔުމުން ލިބިގެންނެވެ.
ފިނޭންސުން އަލަށް އެކުލަވާލި އުސޫލުގައިވާ ގޮތުން ކުންފުނިތަކުގެ ބޯޑު މެންބަރުގެ އިނާޔަތްތައް ދެން ދޭނީ އެއް އުސޫލެއްގެ ދަށުންނެވެ. ކުރިން ސަރުކާރު ކުންފުނިތަކުގެ ޕާފޯމަންސް އެއް އުސޫލަކުން ބެލުމުގެ ބަދަލުގައި ކުންފުނިތައް ކެޓަގަރައިޒްކޮށް ޕާފޯމަންސް ބެލޭނެ ވަކި އުސޫލެއް ނެތްކަމަށް މިނިސްޓްރީން ވަނީ ބުނެފައެވެ.
ސަރުކާރު ހިއްސާވާ ކުންފުނިތަކުގެ ތެރޭގައި އެކި އިންޑަސްޓްރީގައި ހިންގަމުން އަންނަ ކުންފުނިތައް ހުރިއިރު އެ ކުންފުނިތައް ނިސްބަތްވާ އިންޑަސްޓްރީގެ ގޮތުން އަމިއްލަ ޒާތުގައި މާލީ ގޮތުން ހާސިލް ކުރަން ބޭނުންވާ ލަނޑުދަޑިތައް ހާސިލް ކުރުމަށް ދަތިތަކާ ކުރިމަތިވެފައިވާ ކަމަށް ބުނެފައިވެ އެވެ. އަދި ކުންފުނިތަކުގެ ޕާފޯމަންސް އެއް އުސޫލަކުން ބެލުމުގެ ބަދަލުގައި، ކުންފުނިތައް ކެޓަގަރައިޒްކޮށް ޕާފޯމަންސް ބެލޭނެ ވަކި އުސޫލެއް ނުވަތަ މިންގަނޑެއް އޮތުމަކީ މުހިއްމު ކަމެއް ކަމަށެވެ.
ފިނޭންސުގެ މި އުސޫލުގައި ކުންފުނިތަކުގެ ތެރެއިން "އޭ" އާއި "ބީ" އަދި "ސީ" އަދި "ޑީ" ގިންތީގެ ކުންފުނިތަކުގެ އެންމެ އިސްވެރިންނަށް އެންމެ ބޮޑުކޮށް އަދި އެންމެ ކުޑަކޮށް އަސާސީ މުސާރަ ދެވޭނެ މިންވަރު ވެސް ކަނޑައަޅާފައިވެ އެވެ.
އެމްޑީ / ޑީއެމްޑީގެ އަސާސީ މުސާރަ (ޔޫޓިލިޓީ / ޔޫޓިލިޓީ ނޫން ކުންފުނިތައް)
- އޭ ކެޓަރީގެ ކުންފުނިތައް: އެމްޑީ، 52,260 ރުފިޔާ / ޑީއެމްޑީ، 41,808 ރުފިޔާ
- ބީ ކެޓަގަރީގެ ކުންފުނިތައް: އެމްޑީ، 42,880 ރުފިޔާ / ޑީއެމްޑީ، 34,304 ރުފިޔާ
- ސީ ކެޓަގަރީގެ ކުންފުނިތައް: އެމްޑީ، 34,304 ރުފިޔާ / ޑީއެމްޑީ، 27,443 ރުފިޔާ
- ޑީ ކެޓަގަރީގެ ކުންފުނިތައް: އެމްޑީ، 33,000r ރުފިޔާ / ޑީއެމްޑީ، 26,000 ރުފިޔާ
- އީ ކެޓަގަރީގެ ކުންފުނިތައް: އެމްޑީ، 27,443 ރުފިޔާ / ޑީއެމްޑީ، 21,955 ރުފިޔާ
ފިނޭންސް މިނިސްޓްރީން މީގެ އިތުރުން "ފައިނޭންޝަލް ޕަފޯމަންސް އެލަވަންސް" އެއް ދެވޭނެ ގޮތްވެސް ވަނީ ކަނޑައަޅާފަ އެވެ. މި އެލަވަންސް ދެވޭނީ ކުންފުނިތަކުގެ މާލީ ހިސާބުތައް ރިވިއު ކުރުމަށްފަހު ކުންފުނިތަކާއެކު ކުރެވޭ މަޝްވަރާ ތަކަށް ބިނާކޮށް ކަނޑައެޅޭ ޓާގެޓްތައް ހާސިލްވެފައި ވަނީ ކިހާ މިންވަރަކަށް ތޯ ބެލުމަށް ފަހު، ހާސިލްވެފައިވާ މިންވަރަށް ދެވޭ މާކްސް އަކުންނެވެ. އަދި ފާއިތުވި އަހަރުގެ ކުންފުނީގެ މާލީ ގާބިލްކަން ދިރާސާކޮށް މި ކެޓަގަރީގެ ދަށުން މާކްސް ދެވޭނެއެވެ.
ސަރުކާރު ކުންފުނިތައް ގިންތިކޮށްފައިވާ "އޭ" އާއި "ބީ" އަދި "ސީ" ކެޓަގަރީގެ ކުންފުނިތައް ރިވިއު ކުރުމަށްފަހު ފައިނޭންޝަލް ރޭޓިން އިން ލިބޭ މާކްސް އަށް ބަލައި 5,333 ރުފިޔާ އިން ފެށިގެން 30,000 ރުފިޔާ އާ ދެމެދުގެ އެލަންސެއް ދެވޭ ގޮތަށް ވަނީ ހަމަޖައްސާފަ އެވެ. އަދި "ޑީ" އާއި "އީ" ކެޓަގަރީގެ ކުންފުނިތަކުގެ އެންމެ އިސްވެރިންނަށް 8,000 ރުފިޔާ އާއި 30,000 ރުފިޔާ ގެ އެލަވަންސެއް ދެވޭނެއެވެ.
ފިނޭންސުން އެކުލަވާލި މި އުސޫލަށް ބަލާއިރު އެންމެ މަތީ ގިންތީގައި ހިމެނޭ ކުންފުންޏެއްގެ އެމްޑީއެއްގެ މުސާރަ 113،000 ރުފިޔާ އަށްވުރެ ބޮޑު ވާނެއެވެ. އަދި އެންމެ ދަށް ކެޓަގަރީގައި ހިމެނޭ ކުންފުނީގެ އެމްޑީއަކަށް ވެސް ވެސް ޕާފޯމަންސަށް ބަލައި 80،000 ރުފިޔާ ގެއަށް ގެންދިއުމުގެ ފުރުސަތު ފަހިވާނެއެވެ.
ފިނޭންސް މިނިސްޓްރީން ބުނެފައިވާ ގޮތުގައި ކުންފުނިތައް ތަފާތު ކެޓަގަރީތަކަކަށް ކޮންމެ ކެޓަގަރީއެއްގައި ހިމެނޭ ކުންފުނި ގިންތިކުރުމުގައި ކުންފުނީގެ "ޓޯޓަލް އެސެޓާއި" "ޕާފޯމަންސް" އަދި މުވައްޒަފުންގެ އަދަދަށް ބަލައި އެމްޑީންގެ މުސާރަ ކަނޑައެޅޭނެ އުސޫލެއް އޮތުމަކީ މެނޭޖިން ޑިރެކްޓަރުން ކުރާ މަސައްކަތާއި އުފުލާ ޒިންމާ އާއި ކުންފުންޏަށް ހޯދައިދޭ ކާމިޔާބީ އަށް ބިނާ ކޮށް މުސާރައާއި އިނާޔަތް ދިނުމަށް މަގު ފަހިވާނެ ކަމެއް ކަމަށެވެ.
