ކޮވިޑުން ރައްކާތެރިވުމަށް މާލޭ ސަރަހައްދުގައި ހިންގާ ކާފިއު އުވާލަން ސަރުކާރުން ނިންމާފައިވާ ކަން 'ދަ ޕްރެސް' އަށް ކަށަވަރުވެއްޖެއެވެ.
މި އީ ކޮވިޑުން ރައްކާތެރިވުމަށް މެއި މަހު އަޅާފައިވާ ހަރުކަށި ފިޔަަވަޅުތަކަށް ދޭ ލުއި ދިނުމުގެ ގޮތުން ސަރުކާރުން ނިންމާފައި ނިންމުމެކެވެ. އެ ގޮތުން މާދަމާ އިން ފެށިގެން މާލެ، ވިލިމާލެ އަދި ހުޅުމާލޭގައި ހިންގަމުންދާ ކާފިއު އުވާލާ ގޮތަށް ވަނީ ނިންމާފައެވެ.
ކާފިއު އުވާލަން ނިންމާފައިވާ ނިންމުން މިއަދު ރައީސް އޮފީހުން އިއުލާނުކުރާނެ ކަން ވެސް "ދަ ޕްރެސް" އަށް ވަނީ އެނގިފައެވެ.
މި ބަދަލާ އެކު ވިޔަފާރިތައް ހުޅުވައިގެން ހިދުމަތް ދެވޭ ވަގުތަށް ވެސް ވަނީ ބަދަލުތައް ގެނެސްފައެވެ.
އެގޮތުން ރެސްޓޯރަންޓްތައް ރޭގަނޑު 11:30 ވަންދެން އާންމުންނަށް "ޑައިން އިން" ހިދުމަތް ދެވޭ ގޮތަށް ވަނީ ނިންމާފައެވެ. ހަމައެއާއެކު ވިޔަފާރި ކުރާ ތަންތަނަށް ވެސް އާންމުންނަށް ވަދެވޭ ގަޑި މިވަނީ އިތުރުކޮށްފައެވެ.
މީގެ އިތުރުން 30 މީހުންނަށް ވުރެ އިތުރު ނުވާ ގޮތަށް ޕާޓީއާއި ހަފްލާތަކާއި އެއްވުންތައް ބޭއްވޭ ގޮތަށް ވެސް ވަނީ ހަމަޖައްސާފައެވެ. މި ފަދަ އިވެންޓްތައް ބޭއްވޭނީ އެޗްޕީއޭއިން އާންމުކުރާ އުސޫލުތަކާ އެއްގޮތަށެވެ.
ކޮވިޑް ހާލަތު ރަނަގޅު ވަމުން ދާ ވަރަކަށް ލުއިތައް ދޭނެ ކަމަށް ރާއީސް އިބްރާހިމް މުހައްމަދު ސޯލިހް މީގެ ކުރިން ވަނީ ވިދާޅުވެފައެވެ.
އިއްޔެ ރާއްޖެއިން ކޮވިޑަށް ޕޮޒިޓިވްވެފައިވާ މީހުންގެ ޖުމްލަ އަދަދަކީ 105 އެވެ. އެއީ މާލެއިން 23 މީހަކާއި އަތޮޅު ތެރެއިން 74 މީހަކާއި ރިސޯޓުން 7 މީހަކާއި އިންޑަސްޓްރިއަލް ރަށްރަށުން އެކަކެވެ. މި ވަގުތު ކޭސްތައް މަދުން ރިޕޯޓް ކުރަމުން އަންނަ އިރު އެކްޓިވް ކޭސްގެ ގޮތުގައި ތިބީ 3148 މީހުންނެވެ. އަދި ބަލި ޖެހިގެން ހޮސްޕިޓަލުގައި އެޑްމިޓްކޮށްގެން ފަރުވާ ދެމުން ދަނީ 25 މީހަކަށެވެ.
