މިއަދު ޖުމްލަ 224 މީހުން ކޮވިޑަށް ޕޮޒިޓިވް ވެ، މިވަގުތު އެކްޓިވް ކޭސްގެ ގޮތުގައި ތިބި މީހުންގެ އަދަދު 8155 ތިރިވެއްޖެއެވެ.
ހްލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ވޭތުވެދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރެއިން މާލެ ސަރަހައްދުން 111 މީހަކާއި އަތޮޅުތެރޭގެ ރަށްރަށުން 105 މީހަކާއި މިވަގުތު ހިންގަމުން ދާ ރިސޯޓުތަކުން 8 މީހަކު މިއަދު ޕޮޒިޓިވް ވެފައިވާ ކަމަށެވެ. ހަމައެއާއެކު މިއަދު 772 މީހަކު ބަލިން ރަނގަޅުވެފައި ކަމަށް އެޗްޕީއޭއިން ބުނެއެވެ.
މި މަހުގެ 13 ވަނަ ދުވަހު ވެސް 224 މީހަކު ޕޮޒިޓިވް ވެފައި ވާއިރު މިއަދާއެކު މި މަހުގެ 13 ވަނަ ދުވަހަކީ މި ވޭތުވެ ދިޔަ ދެ މަސް ދުވަހުގެ ތެރޭގައި އެންމެ ދަށުން މީހުން ޕޮޒިޓިވްވި ދެ ދުވަހެވެ.
ޕޮޒިޓިވްވި މީހުންނާއެކު އެކްޓިވް ކޭސް މިވަނީ 8155 އަށް ތިރިވެފައި ކަމަށް އެޗްޕީއޭއިން ބުނެއެވެ. އިއްޔެ އެކްޓިވް ކޭސްގެ އަދަދު އުޅުނީ 8703 ގައެވެ. މިހާތަނަށް ރާއްޖެއިން ކޮވިޑް ޖެހުނު ޖުމްލަ އަދަދަކީ 70،897 އެވެ. މީހުންގެ ތެރެއިން 62533 މީހުން މިހާތަނަށް ރަނގަޅުވެފައި ވާއިރު މަރުވި މީހުންގެ އަދަދު މިވަނީ 198 އަށް އަރާފައެވެ. މިއަދު މި ބަލީގައި މިހާތަނަށް މަރުވެފައިވާ މީހަކު ރިޕޯޓު ކޮށްފައެއް ނުވެއެވެ.
މި މަސް ފެށިގެން އައިރު ޕޮޒިޓިވް ކޭސްގެ ގޮތުގައި ރިޕޯޓު ކުރާ އަދަދު އަންނަނީ މަދުވަމުންނެވެ. މިދިޔަ މަހު 1000 އާއި 2000 އާ ދެމެދުން ކޮވިޑް ކޭސް ރިޕޯޓް ކުރަމުން އައި މި މަސް ފެށުނު އިރު ކޭސްތައް ރިޕޯޓު ކުރަނީ 700 އާ ގާތުންނެވެ. މި މަސް ދެބައިވި އިރު، މިމަހު ޕޮޒޮޓިވްވި ޖުމްލަ އަދަދު މި ވަނީ 6501 އަށް އަރާފައެވެ. އަދި މި މަހު މަރުވި މީހުންގެ އަދަދު މި ވަނީ 37 އަށް އަރާފައެވެ.
ކޭސްތައް ދަށް ވުމާ އެކު މާދަމާއިން ފެށިގެން އެޅި ފިޔަވަޅުތަކަށް ލުއި ދިނުމުގެ ގޮތުން ކުރިން މާލޭގައި 16 ގަޑިއިރުގެ ހިންގި ކާފިއު ވަގުތު ވަނީ 12 ގަޑިއިރަށް ކުޑަ ކޮށްފައެވެ. މީގެ އިތުރުން ޖަމާއަތުގައި ނަމާދު ނުކުރެވޭ އެހެނަސް ވަކިން ކުރެވޭ ގޮތަށް މިސްކިތްތައް ހުޅުވާ ކަސްރަތު ކުރާ މީހުންނަށް ޕާމިޓް ނުލައި ފަތިހު 4 އިން 8 އަކާ ދެމެދު ނުކުމެވޭ ގޮތަށް ވަނީ ހަމަޖައްސާފައެެވެ.
ރާއްޖެއިން މި ބަލި ފެންނަން ފެށިތާ މިއަދާ ހަމައަށް 465 ދުވަސްވެފައި ވާއިރު، މި ދިޔަ އަހަރު ނިމުނު އިރު ކޮވިޑް ޕޮޒިޓިވް ކޭސްގެ ގޮތުގައި 13،757 ޖުމްލަ ކޭސް ވަނީ ރިޕޯޓް ކޮށްފައެވެ. އަދި އެ ދުވަހާ ހަމައަށް މަރުވި މީހުންގެ އަދަދު ވަނީ 48 ގައެވެ. ނަމަވެސް ވޭތުވެ ދިޔަ 5 މަސް ދުވަސް ތެރޭގައި ޖުމްލަ ޕޮޒިޓިވް ކޭސްގެ އަދަދު މި ވަނީ 70،000 އިން މައްޗަށް ގޮސްފައެވެ.
