ކޮވިޑް ބަލިމަޑުކަމުން އަރައިގަތުމަށް އަޅާފައިވާ ފިޔަވަޅުތަކަށް ލުއި ދިނުމުގެ ގޮތުން ސެލޫން އަދި ބޯކޮށާ ތަންތަން އެޗްޕީއޭގެ މިންގަނޑުތަކަށް ފައްތައިގެން ހުުވުމުގެ ހުއްދަ ދިނުމަށް ނިންމައިފިއެވެ.
އެޗްޕީއޭއިން ބުނީ މިހާރު މާލެ ސަރަހައްދުގައި ކާފިއު ވަގުތު ހަވީރު 4 އިން ފަތިހު 4 އަށް ހަމަޖައްސާފައިވާ އިރު އިތުރު ލުޔެއްގެ ގޮތުގައި ސެލޫންތައް ހުޅުވައިގެން ހިދުމަތް ދޭގޮތަށް ހުއްދަ ދޭން ނިންމާފައިވާ ކަމަށެވެ. ނަމަވެސް އެ ހުއްދަ ދެވޭނީ އެތަންތަން ހިންގާ ގޮތުގެ ސާވިސް ޕްލޭނެއް އެޗްޕީއޭއަށް ހުށަހެޅުމުން ކަމަށް އެ އެޖެންސީން ބުނެއެވެ.
ހަމައެއާއެކު އެ ސާވިސް ޕްލޭން ބެލުމަށް ފަހު ހުއްދަ ދެވޭ ތަންތަން ހުޅުވައިގެން ހިދުމަތް ދެވޭނީ ހެނދުނު 8 އިން ހަވީރު 4 އަށް ކަމަށް އެޗްޕީއޭއިން ބުނެއެވެ.
ކޮވިޑް ބަލި މިދިޔަ މެއިން މަހު އައީ ވަރަށް ހަލުވި ކަމާއެކު ފެތުރެމުންނެވެ. އެ ގޮތުން ދުވާލަކު ރިޕޯޓު ކުރާ ކޭސްތައް އުޅުނީ އޭރު 1000 އާއި 2000 އާ ދެމެދުއެވެ. ކޭސްތައް ގިނަވެ ގިނަ ބަޔަކު ބަލީގައި މަރުވަމުން ދާތީ މެއިން މަހުގެ 26 ވަނަ ދުވަހު ވަނީ ރައްކާތެރިވުމުގެ ގޮތުން ހަރުކަށި ފިޔަވަޅުތަކެއް އަޅާފައެެވެ. އެ ގޮތުން ސެލޫންތަކާއި ބޯކޮށާ ތަންތަނުން ހިދުމަތް ދިނުން ހުއްޓާލުމަށް އޭރު ވަނީ އަންގާފައެވެ. މިއަދާ ހަމައަށް އެ އުސޫލާ އެއްގޮތަށް ސެލޫންތައް ބަންދުކޮށްފައި އޮންނަތާ 3 ހަފްތާ ވީއެވެ.
މާދަމާއިން ފެށިގެން ސެލޫން ހިންގަން ހުއްދަ ލިބޭ ތަންތަނަށް އާންމުންނަށް ހިދުމަތް ފޯރުކޮށް ދެވޭނެއެވެ. އަދި ހެނދުނު 8 އިން ހަވީރު 4 އަށް ހިދުމަތް ދޭ ގޮތަށް ހުއްދަ ދޭ ތަންތަން ހިންގުމުގެ ފިޔަވަޅު ކުރިއަށް އޮތް ދެ ހަފްތާއަށް ދަމަހައްޓަން ވަނީ ސަރުކާރުން ނިންމާފައެވެ.
މި ލުއިތައް ދޭން ސަރުކާރުން ނިންމާފައި ވަނީ މި މަހުގެ ކޭސްތައް ރިޕޯޓްކުރާ އަދަދު ދަށަށް ދިއުމުންނެވެ. އިއްޔެ 372 ޕޮޒިޓިވް ކޭސް ރިޕޯޓް ކޮށްފައިވާ އިރު މިހާރު އެކްޓިވް ކޭސް އުޅޭނީ 8700 ގައެވެ.
