ރާއްޖެއިން މިއަދު 1062 މީހަކު ކޮވިޑަށް ޕޮޒިޓިވް ވެފައި ވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ ވޭތުވެދިޔަ 24 ގަޑިއިރުގެ ތެރޭގައި ޕޮޒިޓިވް ވި މީހުންގެ ތެރެއިން 699 މީހުންނަކީ މާލެ ސަރަހައްދުން ޕޮޒިޓިވް ވި މީހުން ކަމަށެވެ. އެއާއެކު މީހުން ދިރިއުޅޭ ރަށްރަށުން 353 މީހަކާއި މިވަގުތު ހިންގަމުން ނުދާ ރިސޯޓުތަކުން 9 މީހަކާއި ތަރައްގީ ކުރަމުން ދާ ރަށަކުން މީހަކު ޕޮޒިޓިވް ވެފައި ވާ ކަމަށެވެ.
މިއަދު ޕޮޒިޓިވްވި މީހުންނާއެކު އެކްޓިވް ކޭސް މިވަނީ 24،507 އަށް އަރާފައެވެ. އަދި ކޮވިޑް ޖެހުނު 62،906 މީހުންގެ ތެރެއިން 38،233 މީހުން މިހާތަނަށް ރަނގަޅުވެފައި ވާއިރު މަރުވި މީހުންގެ އަދަދު މިވަނީ 157 އަށް އަރާފައެވެ.
މިއަދު ކޮވިޑުގައި އެކަކު މަރުވެފައި ވާއިރު އިއްޔެ ވަނީ 5 މީހަކު މަރުވެފައެވެ.
މޭ 26 އިން ފެށިގެން ކޮވިޑުން ރައްކާތެރިވުމަށް މާލެ ސަރަހައްދުގައި އަޅާފައިވާ ފިޔަވަޅުތަކުގެ ތެރޭގައި ހަވީރު 4 އިން ފެށިގެން ހެނދުނު 8 އަށް ކާފިއު ވަނީ ހިންގާފައެވެ. ހަމައެއާއެކު ކާފިއު ނޫން ވަގުތު ތަކުގައި ބޭރަށް ނުކުމެވެނީ ހުއްދަ ދީފައި އޮންނަ ފާސް ހިފައިގެންނެވެ.
