ކޮވިޑް-19 އިން ރައްކާތެރިވުމަށް އަޅާފައިވާ ހާއްސަ ފިޔަވަޅުތަކާ ގުޅިގެން، މާދަމާއިން ފެށިގެން ޖޫން 9، 2021 ގެ ނިޔަލަށް މާލެ، ހުޅުމާލެ އަދި ވިލިމާލޭގައި ހިންގާ ފިހާރަތަކާއި ކެފޭތަކުގެ މުވައްޒަފުން ހުއްދަ ހޯދަން ޖެހޭނެ ކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ބުނީ މުދާ ވިއްކާ ތަންތަނާއި ކެއުން ބުއިމުގެ ހިދުމަތް ދޭ ތަންތަނުން ޑެލިވަރީ ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށް ފަހު، ހެނދުނު 6.00 އިން މެންދަމު 12.00 އަށް ކަމަށާއި މުދާ ވިއްކާ ތަންތަން އާންމުންނަށް ހުޅުވާލައިގެން ހިދުމަތް ދެވޭނީ، އެ ތަނެއްގައި މަސައްކަތްކުރާ މުވައްޒަފުންނަށް ހުއްދަ ހޯދުމަށް ފަހު، ހެނދުނު 8.00 އިން ހަވީރު 4.00 އަށް ކަމަށެވެ.
މުދާ ވިއްކާ ތަންތަނުގައި މަސައްކަތް ކުރާ މުވައްޒަފުންނާއި ޑެލިވަރީ މުވައްޒަފުންނަށް ހުއްދަ ހޯދުމަށް އެދޭނީ، މޯލްޑިވްސް ޕޮލިސް ސާވިސްގެ ޕޯޓަލް މެދުވެރިކޮށް ކަމަށް މިނިސްޓްރީން ބުނެއެވެ.
މިނިސްޓްރީން ބުނީ މުދާ ވިއްކުމުގެ ވިޔަފާރިކުރާ ކޮންމެ ތަނަކަށް 2 ސަޕޯޓް ސްޓާފް އަދި 2 ޑެލިވަރީ ސްޓާފުންނަށް ހުއްދަ ދޫކުރާނެ ކަމަށާއި އިތުރު މުވައްޒަފުންނަށް ހުއްދަ ބޭނުން ވާނަމަ، އެކަމަށް ބޭނުންވާ އެއްޗެހި ފޮނުވުމުން އިތުރަށް ދިރާސާ ކުރުމަށް ފަހު، ހުއްދަ ދޫކުރާނެ ކަމަށެވެ. އަދި ކެއުން ބުއިމުގެ ހިދުމަތް ދޭ ކޮންމެ ތަނަކަށްވެސް، 4 ސަޕޯޓް ސްޓާފް އަދި 2 ޑެލިވަރީ ސްޓާފުންނަށް ހުއްދަ ދޫކުރެވޭނެ ކަމަށެވެ.
އަދި އިތުރު ހުއްދައަށް އެދޭ ކޮންމެ ފަރާތަކުންވެސް، ޖުމްލަ މުވައްޒަފުންގެ އަދަދު 10 އަށް ވުރެ އިތުރުވާނަމަ، 2 ދަންފަޅިއަކަށް ބަހާލައިގެން ޑިއުޓީ ގަޑި ކަނޑައަޅާ، މި މެއިލްއަށް އިއުލާނާ އެކު ޝާއިއުކޮށްފައިވާ އެކްސެލް ޝީޓުގައި ބަޔާން ކުރަންވާނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ރަޖިސްޓްރީ ކޮށްފައިވާ ވިޔަފާރިތަކުން އޮފީހުގައި މަސައްކަތް ކުރަންޖެހޭ މުވައްޒަފުން އޮފީހަށް ދިޔުމަށް ބޭނުންވާ ގަޑި އަދި ކުރަންޖެހޭ މަސައްކަތުގެ ތަފްސީލު މި މެއިލްއަށް އިއުލާނާއެކު ޝާއިއު ކޮށްފައިވާ އެކްސެލް ޝީޓް ފުރިހަމަ ކުރުމަށް ފަހު ފޮނުވުމުން ހުއްދަ ދޫކުރާނެ ކަމަށެވެ.
އޭގެ ތެރޭގައި، އެއާޕޯޓުގައި މަސައްކަތް ކުރަން ޖެހޭ މުވައްޒަފުން، އެއާލައިންތަކުގެ މުވައްޒަފުން އަދި ސްޓޫޑިއޯއަށް ނުވަތަ މަސައްކަތްކުރާ ތަނަށް ގޮސްގެން މަސައްކަތް ކުރަންޖެހޭ މުވައްޒަފުންނަށް އެ ވިޔަފާރިއަކުން، މަސައްކަތްކުރާ ތަނުގެ ތަފްސީލާއެކު ހުއްދަ ހޯދުމަށް އެދި ހުށަހެޅިދާނެ ކަމަށް މިނިސްޓްރީން ބުނެއެވެ.
ހަމައެހެންމެ ތިލަފުށީގައި ހިންގާ ސިނާއީ މަސައްކަތްތަކަށް ގުދަން، ބޯޓުޔާޑު ފަދަ ތަންތަނުގައި މަސައްކަތްކުރާ މުވައްޒަފުންނާއި، މާލެ-ތިލަފުށި ގައި ދާއިމީކޮށް ދިރިއުޅޭ ފަރާތްތައް މަސައްކަތައް ދިޔުމަށް މޯލްޑިވްސް ޕޮލިސް ސާވިސްއިން އިތުރު ހުއްދައެއް ނަގާކަށް ނުޖެހޭނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ ކޮންސްޓްރަކްޝަން ސައިޓްތަކުގައި މަސައްކަތް ކުރުމަށް ހުއްދަ ދޫކުރެވޭނީ، އެ ސައިޓަކަށް ގެއްލުމެއް ލިބޭނެފަދަ ހާލަތުތަކުގައި، އެ ކަމެއްގެ ތަފްސީލު ފޮނުވުމުން އިތުރަށް ދިރާސާ ކުރުމަށް ފަހު ކަމަށެވެ.
