ކޮވިޑް ޖެހިގެން އިތުރު ދެ މީހަކު މަރުވެ ޖުމްލަ އަދަދު 144 އަށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ މިއަދު ފުރަތަމަ މީހަކު މަރުވެފައި ވަނީ ރޭ ދަންވަރު 1:1 ހާއިރު އުމުރުން 66 އަހަރުގެ ދިވެހި ފިރިހެނެއް ކަމަށެވެ. އަދި ދެވަނަ މީހާ މަރުވެފައި ވަނީ މިއަދު ހެނދުނު 7:40 ހާއިރު ކަމަށާއި އެއީވެސް ދިވެހި ފިރިހެނެއް ކަމަށެވެ. އެ ދެ މީހުންނަކީވެސް ހުޅުމާޅެ ލެޑިކަލް ފެސިލިޓިގައި ފަރުވާ ދެމުން ދަނިކޮށް މަރުވި ދެ މީހުންނެވެ.
ރާއްޖޭގައި ކޮވިޑަށް ޕޮޒިޓިވްވެ ބަލީގައި މަރުވާ މީހުންގެ އަދަދު އިތުރު ވެފައި ވާއިރު، އިއްޔެ އެކަނި ވެސް ވަނީ 14 މީހަކު މަރުވެފައެވެ. މިއީ އެއް ދުވަހެއްގެ ތެރޭގައި ކޮވިޑްގައި މިހާ ގިނަ މީހުން މަރުވި ފުރަތަމަ ދުވަހެވެ. އޭގެ ތެރެއިން 11 މީހުން މަރުވެފައި ވަނީ ހުޅުމާލެ މެޑިކަލް ފެސިލިޓީގައި ފަރުވާ ދެމުން ދަނިކޮށެވެ.
އަދި މި މަހުގެ ތެރޭގައި މަރުވި މީހުންގެ އަދަދު 70 އަށް އަރާފައި ވާއިރު، މި ބަލީގައި މިހާތަނަށް މަރުވި މީހުންގެ ޖުމްލަ އަދަދު ވަނީ 144 އަށް އަރާފައެވެ. ހުޅުމާލެ މެޑިކަލް ފެސިލިޓީގައި އައިސީޔޫ އެނދާއެކު ޖުމްލަ 274 އެނދު ހުންނައިރު، އިއްޔެއާ ހަމައަށް 188 އެނދުގައި މީހުން ވަނީ އެޑްމިޓް ކޮށްފައެވެ.
