ކޮވިޑް-19ގެ މި ނުރައްކާތެރި ވަގުތަކީ ބަލި ގަބޫލުކުރަންވީ ވަގުތު ނޫން ކަމަށާއި މިއީ އެންމެންގެ މަސައްކަތް އިތުރުކުރަންވީ ވަގުތު ކަމަށް އޭޑީކޭގެ ޗީފް މެޑިކަލް އޮފިސަރު އަދި ކުޑަކުދިންގެ ހާއްސަ ޑޮކްޓަރު ޑރ. އަބްދުﷲ ނިޔާފް ވިދާޅުވެއްޖެއެވެ.
ޑރ. ނިޔާފް ވިދާޅުވީ ކޮންމެ މީހަކުވެސް އެ ގެންދަނީ އަމިއްލަ ހަނގުރާމައެއް (ކޮވިޑާ ކުރާ ހަނގުރާމަ) ކުރަމުން ކަމަށެވެ. ހިތާމައަކީ ކޮންމެ ދުވަހަކުވެސް ބަޔަކު މި ހަނގުރާމައިގައި ބަލިވާކަން ކަމަށާއި މި ދުވަސްތަކަކީ ހިތްވަރު އެލޭ ކަހަލަ ދުވަސްތަކެއް ކަމަށެވެ. މަރަކަށް ފަހު މަރެއް ވަމުން ދާއިރު ފަހަރަކު މީހަކު މިދަނީ ގެއްލެމުން ކަމަށް ޑރ. ނިޔާފް ވިދާޅުވިއެވެ.
އެހެންކަމުން ޑރ. ނިޔާފް ވިދާޅުވީ މި ވަގުތަކީ އެންމެން އިތުރަށް މަސައްކަތް ކުރަންވީ ކަމަށެވެ. އަދި އެކަކުވެސް އިސްތިސްނާ ނުވާނެހެން އެމީހަކަށް ކުރެވުނު ކަމެއް ކޮށް މި ހާލަތު ބަދަލުކުރަން މަސައްކަތް ކުރަން ޖެހޭ ކަމަށް އޭނާ ވިދާޅުވިއެވެ.
ރާއްޖޭގައި ކޮވިޑުގެ ހާލަތު ގޯހުން ގޯހަށް ދާއިރު، މިއަދު އެކަނި މިހާތަނަށް ވަނީ 10 މީހަކު މަރުވެފައެވެ. އޭގެ ތެރެއިން 8 މީހުން މަރުވެފައި ވަނީ ހުޅުމާލެ މެޑިކަލް ފެސިލިޓީގައި ފަރުވާ ދެމުން ދަނިކޮށެވެ.
1000 މަތީގައި މާލޭގެ ކޮވިޑް ކޭސްތައް އުޅޭއިރު މިއީ އެއް ދުވަހެއްގެ ތެރޭގައި ކޮވިޑްގައި މިހާ ގިނަ މީހުން މަރުވި ފުރަތަމަ ދުވަހެވެ. އަދި މި މަހުގެ ތެރޭގައި މަރުވި މީހުންގެ އަދަދު 67 އަށް އަރާފައި ވާއިރު، މި ބަލީގައި މިހާތަނަށް މަރުވި މީހުންގެ ޖުމްލަ އަދަދު ވަނީ 139 އަށް އަރާފައެވެ.
