ކޮވިޑް ޖެހިގެން ޅ. ހިންނަވަރުގައި ފަރުވާދެމުންދިޔަ މީހަކު މަރުވެއްޖެއެވެ.
"ދަ ޕްރެސް" އަށް މައުލޫމާތު ދެއްވަމުން ހިންނަވަރު ކައުންސިލްގެ ރައީސް ހަސަން ޝާފިއު ވިދާޅުވީ މިއަދު ހެނދުނު 11 ޖެހިއިރު ހިންނަވަރު ސިއްހީ މަރުކަޒުގައި ކޮވިޑަށް ފަރުވާ ހޯދަމުންދިޔަ 87 އަހަރުގެ ފިރިހެނެއް މަރުވެފައިވާ ކަމަށެވެ.
މިމީހާ މަރުވީ ކޮވިޑް ޖެހިގެން ކަން ހެލްތް ޕްރޮޓެކްޝަން އެޖެންސީ އެޗްޕީއޭއިން އަދި ކަނޑައެއް ނާޅައެވެ.
މިއީ މިއަދު ކޮވިޑް ޖެހިގެން މަރުވި ހަތް ވަނަ މީހާއެވެ. މިއަދު ފުރަތަމަ މަރުވެފައިވަނީ އައިޖީއެމްއެޗްގެ އީއާރަށް ގެނެވުނު 81 އަހަރުގެ ދިވެހި ފިރިހެނެކެވެ. އެއީ ރޭ ދަންވަރު 02:02 ހާއިރުއެވެ.
ދެވަނަ މީހާ މަރުވެފައިވަނީ ރޭ ފަތިހު 04:25 ހާއިރުއެވެ. އެއީ ހުޅުމާލޭ މެޑިކަލް ފެސިލިޓީގައި ފަރުވާދެމުންދިޔަ 58 އަހަރުގެ ދިވެހި ފިރިހެނެކެވެ. އަދި
މިއަދު ތިންވަނައަށް މަރުވެފައިވަނީ ދަަންވަރު 03:18 ހާއިރު ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 77 އަހަރުގެ ދިވެހި ފިރިހެނެކެވެ.
މިއަދު ހަތަރު ވަނަ އަށް މަރުވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ 93 އަހަރުގެ ދިވެހި ފިރިހެނެކެވެ. އެއީ މިއަދު 06:55 އެވެ. އަދި ފަސްވަނައަށް މަރުވެފައިވަނީ މިއަދު ހެނދުނު 07:44ގައި ހުޅުމާލޭ މެޑިކަލް ފެސިލިޓީގައި ފަރުވާދެމުން ދިޔަ 85 އަހަރުގެ ދިވެހި ފިރިހެނެކެވެ.
މި މަހަކީ ކޮވިޑް ގައި އެންމެ ގިނަ މީހުން މަރުވި އަދި އެންމެ ގިނަ މީހުން ޕޮޒިޓިވްވި މަހެވެ. މިގޮތުން މިހާތަނަށް މިމަހުގެ ތެރޭގައި 63 މީހުން ވަނީ ކޮވިޑް ޖެހިގެން މަރުވެފައެވެ.
