ކޮވިޑް-19ގެ މި ބަލިމަޑުކަމުގައި އަތޮޅުތަކުގެ އިންތިޒާމު ދަށްކަމުން ރައްޔިތުން މަޖިލީހަށް ކުއްލި މައްސަލައެއް ހުށަހަޅާފިއެވެ.
އެ ކުއްލި މައްސަލަ ހުށަހަޅުއްވާފައިވަނީ ޕީއެންސީގެ ނައިބު ރައީސް، މާވަށު ދާއިރާގެ މެންބަރު މުހައްމަދު ސައީދުއެވެ.
ސައީދު ވިދާޅުވީ އެއީ ކޯވިޑްގެ ހާލަތު އިތުރަށް ގޯސްވަމުން ދިއުމާއި ލ. މާވަށުގެ ހާލަތު ގޯސްވެ ހިތަދޫއާއި އަތޮޅުތެރޭގެ އިންތިޒާމްތަކުގައި ހުރި މައްސަލަތައް ސަރުކާރުގެ ސަމާލުކަމަށް ގެނައުމަށް ހުށައަޅާ ކުއްލި މައްސަލައެއް ކަމަށެވެ.
އެކުއްލި މައްސަލާގައި ސައީދު ވިދާޅުވީ ދައުލަތުގެ ފައިސާ 2020 އިން ފެށިގެން ކޮވިޑްގައި ހަރަދުކޮށް ވަސީލަތްތައް ރަނގަޅު ކުރުމަށް މަސައްކަތް ކުރާކަމަށް ސަރުކާރުން ބުނަމުން އަންނަކަމަށެވެ. އެހެންނަމަވެސް އެއިން ކަމަކުން ރައްޔިތުންނަށްވި ފަސޭހައެއް ނެތްކަމަށް ސައީދު ވިދާޅުވިއެވެ.
އޭގެ އިތުރުން ބަލި އިތުރަށް ފެތުރު ބަލީގައި މީހުން މަރުވާ ރޭޓް އިތުރުވާތީ އެކަމަށް އަވަސް ފިޔަވަޅު އެޅުމަށް ސަރުކާރަށް ގޮވާލާ ކުއްލި މައްސަލަ ހުށަހަޅާ ކަމަށް ސައީދު ވިދާޅުވިއެވެ.
މި މަހަކީ ކޮވިޑް ގައި އެންމެ ގިނަ މީހުން މަރުވި އަދި އެންމެ ގިނަ މީހުން ޕޮޒިޓިވްވި މަހެވެ. މިގޮތުން މިހާތަނަށް މިމަހުގެ ތެރޭގައި 61 މީހުން ވަނީ ކޮވިޑް ޖެހިގެން މަރުވެފައެވެ.
އިއްޔެ ރާއްޖެއިން ކޮވިޑް19 އަށް 1559 މީހުން ޕޮޒިޓިވްވެފައިވާއިރު އެކްޓިވް ކޭސްގެ އަދަދު 23،464 ވަނީ އަރާފައެވެ. އަދި ޕޮޒިޓިވްވި މީހުންގެ ޖުމްލަ އަދަދު ވަނީ 55،924 އަށް އަރާފައެވެ.
