ކޮވިޑް-19ގައި ރާއްޖެއިން އިތުރު ދިވެއްސަކު މިއަދު ނިޔާވެ، މިބަލީގައި ރާއްޖެއިން މަރުވި ދިވެހިންގެ އަދަދު 103 އަށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ އެ މީހާ މަރުވެފައި ވަނީ މިއަދު ހެނދުނު 10:54 ހާއިރު ކަމަށެވެ. އަދި އެއީ 77 އަހަރުގެ ދިވެހި އަންހެނެއް ކަމަށެވެ. އަދި އޭނާއަކީ ހުޅުމާލޭ މެޑިކަލް ފެސިލިޓިގައި ފަރުވާ ހޯދަމުން ދިޔަ މީހެކެވެ. މި މަރާއެކު ރާއްޖެއިން ކޮވިޑް ބަލީގައި މަރުވި މީހުންގެ އަދަދު ވަނީ 118 އަށް އަރާފައެވެ.
ރޭ ފަތިހުވެސް ވަނީ މި ބަލީގައި ދިވެއްސަކު ނިޔާވެފައެވެ. އެ މީހާ މަރުވެފައި ވަނީ ރޭ ފަތިހު 4:06 ހާއިރެވެ. އެއީވެސް 77 އަހަރުގެ ދިވެހި ފިރިހެނެކެވެ. އަދި އޭނާއަކީވެސް ހުޅުމާލޭ މެޑިކަލް ފެސިލިޓިގައި ފަރުވާ ހޯދަމުން ދިޔަ މީހެކެވެ.
އިއްޔެ މި ބަލީގައި ހަތަރު މީހަކު މަރުވެފައި ވާއިރު ކޮވިޑް ޖެހިގެން އެންމެ ގިނަ މީހުން ރާއްޖެއިން މަރުވެފައިވަނީ މި ހިނގާ މޭ މަހުއެވެ. މިމަހު މިހާތަނަށް 43 މީހުން ކޮވިޑް ޖެހިގެން މަރުވެފައިވެއެވެ. އިއްޔެވެސް ވަނީ ކޮވިޑް ޖެހިގެން ރެކޯޑް އަދަދަކަށް މީހުން މަރުވެފައެވެ. މިދިޔަ އަންގާރަ ދުވަހު ޖުމްލަ 7 މީހުން ކޮވިޑް ޖެހިގެން މަރުވެފައިވެއެވެ.
ކޮވިޑަށް ޕޮޒިޓިވްވާ މީހުން އިތުރުވުމާ ކޮންޓެކްޓުން އިތުރުވުމާ ގުޅިގެން މިރޭ އެޗްޕީއޭއިން ވަނީ ކޮންޓެކްޓް ޓްރޭސިން ހެދުމުގެ އުސޫލަށްވެސް ބަދަލުތަކެއް ގެނެސްފައެވެ. އެގޮތުން މާލެ ސަރަހައްދުގައި ދެން ކޮންޓެކްޓް ޓްރޭސިން ހަދާނީ ހަމައެކަނި ހައި ރިސްކް މީހުންގެ އެކަނިކަމަށް އެޗްޕީއޭއިން ވަނީ ބުނެފައެވެ.
