ރާއްޖޭގައި ކޮވިޑް ބަލީގެ ހާލަތު މިހާރު ނުރައްކާ ފައްތަރަކަށް ގޮސް ހޮސްޕިޓަލްތަކުގެ އެނދުތައް ފުރި ސިއްހީ ފަރުވާދޭ މީހުން ގޮތް ހުސްވެއްޖެއެވެ.
މައުލޫމާތު ލިބިފައިވާ ގޮތުގައި ކޮވިޑަށް ފަރުވާ ދެމުންދާ ހުޅުމާލެ މެޑިކަލް ފެސިލިޓީގެ އައިސީޔޫ އަދި ހައި ޑިޕެންޑެންސީ ޔުނިޓްގައި ބަލި މީހުންނަށް ފަރުވާ ދޭ އެނދުތައް ފުރިއްޖެއެވެ. މި ކަމާ ގުޅިގެން ރައީސް އޮފީހުގެ ތަރުޖަމާނު މުހައްމަދު މަބްރޫކް 'ދަ ޕްރެސް' އަށް މައުލޫމާތު ދެއްވަމުން ވިދާޅުވީ، މި ވަގުތު އައިޖީއެމްއެޗް ގެ ހިޔާ ވިންގް އާއި ހުޅުމާލެ މެޑިކަލް ފެސިލިޓީއާއި ޑީއެޗް16 ގައި އަދި އެނދުގެ ޖާގަ އެބަ ހުރި ކަމަށެވެ.
ސިއްހީ ދާއިރާގައި މަސައްކަތް ކުރާ މީހުން މިހާރު ބުނަމުން ދަނީ އެ މީހުންނަށް ގޮތް ހުސްވާ ހިސާބަށް ހާލަތު ބަދަލުވެފައިވާ ކަމަށެވެ. ކޮވިޑް ބަލިމަޑުކަން ފެތުރި މި ވަގުތު ފަރުވާ ދެމުންދާ ތަންތަން ފުރެމުންދާ ކަމަށް ބުނެ އެ ދާއިރާގައި މަސައްކަތް ކުރާ މީހަކު ކުރި ޓްވީޓެއްގައި ބުނެފައި ވަނީ، ހުޅުމާލެ މެޑިކަލް ފެސިލިޓީގައި ހުންނަ އައިސީޔޫގައި މި ވަގުތު ހުރި އެނދުތައް ވަނީ ފުރިފައި ކަމަށާއި އަދި ހައި ޑިޕެންޑެންސީ ޔުނިޓް ވެސް ވަނީ މިވަގުތު ފުރިފައި ކަމަށެވެ.
މި ވަގުތު އުމުރުން ދުވަސްވީ މީހުންނަށް ފަރުވާ ދޭއިރު ދިމާވާ ދަތިތައް ހިއްސާކުރަމުން އޭނާ ބުނީ ލޭގައި އޮކްސިޖަން ހުންނަ މިންވަރު 60 ޕަސެންޓަށް ވުރެ ދަށުގައި ހުންނަ މީހާ އެޑްމިޓްކުރާނެ އެނދެއް ނެތި މަޑުކުރަން ޖެހޭ ކަމަށެވެ، އެ ގޮތުން ގަޑިއިރެއް ވަންދެން ގޮނޑިއެއްގައި އެފަދަ ބަލި މީހުން ބައިތިއްބަން ޖެހޭ ކަމަށް ވެސް އޭނާ ބުނެއެވެ.
މިއަދު ފެނިގެން މިދަނީ ސިއްހީ ހިދުމަތްތެރިން ދެކެން ބޭނުން ނުވާ ދުވަހެއް ކަަމަށް އޭނާ ބުނެއެވެ. ފަރުވާ ހޯދަން ހާލު ދެރަވެގެން އަންނަ ބަލި މީހުންގެ ތެރެއިން އެޑްމިޓް ކުރުމުގައި ވަކި މީހަކު މިހާރު ހިޔާރު ކުރަން ޖެހުމަކީ ހާލަތު ނުރައްކާ ވެފައިވާ މިންވަރު ދައްކުވައިދޭ ކަމެއްގެ ގޮތުގައި އޭނާ ސިފަކުރެއެވެ.
މި ވަގުތު ކޮވިޑް ބަލީގައި 274 މީހަކަށް ފަރުވާ ދެމުންދާ އިރު އޭގެތެރޭގައި ސިއްހީ ދާއިރާގައި މަސައްކަތް ކުރާ އެތައް ބަޔަކު ހިމެނޭ ކަމަށް ބައެއް ޑޮކްޓަރުން އަންނަނީ ބުނަމުންނެވެ. އެގޮތުން ކޮވިޑް ބަލީގައި ފަރުވާ ހޯދަމުން އަންނަ ބައެއް ޑޮކްތަރުންގެ ހާލުވެސް ސީރިއަސް ކަމަށް އެ ފަރާތްތަކުން ބުނެއެވެ.
ރާއްޖޭގައި މިވަގުތު ކޮވިޑް ބަލި ހަލުވިކަމާއެކު ފެތުރެމުންދާ އިރު ޖުމްލަ 14 މީހަކަށް މިހާރު އައިސީޔޫގައި އެޑްމިޓްކޮށްގެން ފަރުވާ ދެމުން އަންނަ އިރު ވެންޓިލޭޓަރުގައި މި ވަގުތު 9 މީހަކަށް އަންނަނީ ފަރުވާ ދެމުންނެވެ. މީގެ އިތުރުން 168 މީހަކު އައިސޮލޭޝަން ފެސިލީޓީގައި އެބަ ތިބި ކަަމަށް އެޗްޕީއޭ އިން ބުނެއެވެ.
ރާއްޖޭގައި މިވަގުތު އެކްޓިވް ކޭސްގެ ގޮތުގައި 18،843 މީހަކު އެބަ ތިއްބެވެ. އަދި މާލެ ސިތީން ކޮންމެ ދުވަހަު ޕޮޒިޓިވްވާ ރޭތް އަންނަނީ އިތުރުވަމުންނެވެ. ކޭސްތައް އިތުރުވަމުން އަންނާތީ އެޗްޕީޢޭއިން ރައްކާތެރިވުމުގެ ގޮތުން ގިނަ ފިޔަވަޅުތަކެއް އަޅާފައި ވީ ނަމަވެސް އަދިވެސް މާލެތެރޭގައި ކޭސްތައް މަދުވާތަނެއް ނުފެނެއެވެ.
ދުވާލެއްގެ މައްޗަށް ގިނަ ކޭސްތަކެއް ރިޕޯޓް ކުރާ އިރު މި މަސްތެރޭ މި ބަލީގައި މަރުވި މީހުންގެ އަދަދު ވެސް ވަނީ އިތުރުވާން ފަށާފައެވެ. މިހާރު ޖުމްލަ 112 ކޮވިޑް މަރު ރިޕޯޓް ކޮށްފައިވާ އިރު އޭގެތެރެއިން މިދިޔަ އަހަރު މަރުވެފައި ވަނީ 51 މީހެކެވެ. އަދި މި އަހަރު މަރުވެފައި ވަނީ 61 މީހެކެވެ. އިއްޔެ އެކަނިވެސް 7 މީހަކު ވަނީ މި ބަލީގައި މަރުވެފައެވެ.
އެހެންކަމުން ހުރިހާ ސިއްހީ އެހީތެރިންނާއި ފްރަންޓްލައިންގައި ބުރަކޮށް މަސައްކަތް ކުރަމުންދާ މީހުން ދަނީ ބަލީގެ ނުރައްކާ ބޮޑުވަމުންދާ ކަމަށް ކެނޑި ނޭޅި ބުނަމުންނެވެ. ގޭގައި ތިބުމަށާއި ކޮންޓެކްޓްވާ މީހުން މަދުކޮށް އެޗްޕީއޭއިން އަންގާފއިވާ ގޮތަށް އަމަަލު ކުރުމަށް ސިއްހީ މާހިރުން ލަފާ ދެއެވެ.
