ކޮވިޑް ފެތުރުން ކޮންޓްރޯލް ކުރުމަށް ގއ. ވިލިނގިލީގައި 10 ގަޑިއިރު ކާފިއު ހިންގަން އެޗްޕީއޭއިން އިއުލާން ކޮށްފިއެވެ.
ވިލިނގިލީގައި ކޮވިޑުން ރައްކާތެރި ވުމަށްޓަކައި މިއަދުން ފެށިގެން ހާއްސަ ފިޔަވަޅުތަކެއް އަޅަން އެޗްޕީއޭއިން ނިންމާފައި ވާއިރު، އެ ފިޔަވަޅުތައް އަޅާފައި ވަނީ 7 ދުވަހުގެ މުއްދަތަކަށް ކަމަށް އެޗްޕީއޭއިން ކުރި އިއުލާނުގައި ބުނެއެވެ. އެހެންކަމުން އެ ފިޔަވަޅުތައް އަޅާފައިވާ މުއްދަތު ހަމަވާނީ މި މަހުގެ 26 ވަނަ ދުވަހާ ހަމައަށެވެ.
ކާފިއު ހިންގުމުގެ އިތުރުން އެރަށުގައި އަމަލުކުރުމަށް އަޅާފައިވާ ފިޔަވަޅުތަކަށް ބަލާއިރު، ޕާޓީތަކާއި، ހަފްލާތަކާއި، ރަސްމިއްޔާތުތައް ބޭއްވުން ހުއްޓައިލުމަށް ވެސް އެޗްޕީއޭއިން ވަނީ އަންގާފައެވެ. އެއްގެއިން އަނެއް ގެއަށް ޒިޔާރަތް ކުރުން ހުއްޓާލުމަށާއި އެއްފަހަރާ 3 މީހުންނަށް ވުރެ ގިނަ މީހުން މަގުމައްޗާއި އާންމު ތަންތާނގައި އެއްވެއުޅުން ހުއްޓާލުމަށް ވެސް ވަނީ އަންގާފައެވެ.
ހަމައެއާއެކު ސެލޫންތަކާއި، ޖިމްތާކާއި، ބޯކޮށާ ތަންތަން ބަންދުކުރުމަށާއި ހުރިހާ ކުޅިވަރު ހަރަކާތްތަކާއި، ކަސްރަތުގެ ހަރަކާތްތައް ހިންގުން ހުއްޓައިލުމުގެ އިތުރުން ޓެކްސީގެ ހިދުމަތް ދޭ ފަރާތްތަކުން، ހެލްތު ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ޓެކްސީގެ ހިދުމަތް ދިނުމަށް ވެސް އެޗްޕީއޭ އިން ބުނެއެވެ. މީގެ އިތުރުން ފިހާރަތަކުން ހިދުމަތް ދޭއިރު ހެލްތު ޕްރޮޓެކްޝަން އެޖެންސީން އާންމުކޮށްފައިވާ ގައިޑްލައިނާ އެއްގޮތަށް ހިދުމަތް ދިނުމާއި ޔުނިވަރސިޓީތަކާއި ކޮލެޖްތަކަށް ދަރިވަރުން ހާޒިރުވެގެން ކުލާސްތައް ކުރިއަށް ގެންދިޔުން ހުއްޓައިލުމަށް ވެސް އެ އެޖެންސީން ބުނެއެވެ. އަދި ހޮޓާތަކާއި، ކެފޭތަކާއި، ރެސްޓޯރަންޓް ތަކާއި، ކާބޯތަކެތީގެ ހިދުމަތް ދޭ އެހެނިހެން ތަންތަނުން ދެމުންގެންދާ ހިދުމަތްތައް ހުއްޓާލުމަށާއި ނަމަވެސް އެތަންތަނުން ކާފިއު ވަގުތު ނޫން ވަގުތު ތަކުގައި ޓޭކްއަވޭއާއި ޑެލިވަރީގެ ހިދުމަތް ދެވޭނެ ކަމަށް އެ އެޖެންސީން ބުނެއެވެ.
ވިލިނގިލީގައި ކާފިއު ހިންގަން މިއަދު ފަށާއިރު ކޮވިޑް ފެތުރުން ކޮންޓްރޯލް ކުރުމަށް އެރަށް މޮނިތަރިންގެ ހާލަތަށް ލާފައި ވަނީ މި މަހުގެ 15 ވަނަ ދުވަހުއެވެ. މިހާރު ހުވަދު އަތޮޅުގެ ޖުމްލަ 6 ރަށެއް އޮތީ މޮނިޓަރިންގް ހާލަތުގައެވެ. އެ ރަށްތަކަކީ ވިލިނގިލީގެ އިތުރުން ގއ. ތިނަދޫ، ގދ. ގައްދޫ، ގއ. ގެމަނަފުށި، ގއ. ދާންދޫ، އަދި ގދ. ވާދޫ އެވެ.
ހުވަދު އަތޮޅުގައި މިވަގުތު އެކްޓިވް 177 ކޭސް އެބަ ހުއްޓެވެ. އެއީ ގދ. އަތޮޅުން 97 ކޭސް އަދި ގއ. އަތޮޅުން 80 ކޭސް އެވެ.
މިއަދު ވިލިނގިލީގައި 10 ގަޑިއިރަށް ކާފިއު ހިންގާއިރު މިއަދުން ފެށިގެން 7 ދުވަހަށް އައްޑޫ ސިޓީއާއި ފުވައްމުލައް ސިޓީގެ އިތުރުން ލ. ގަމުގައި 12 ގަޑިއިރަށް ކާފިއު ހިންގަން އެޗްޕީއޭއިން ވަނީ އަންގާފައެވެ.
