ރާއްޖެއިން ކޮވިޑް ޖެހި އިތުރު މީހަކު މަރުވެ ކޮވިޑަގައި މަރުވި މީހުންގެ އަދަދު 105 އަށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނީ މަރުވެފައި ވަނީ 66 އަަހަރުގެ ދިވެހި އަންހެނެއްކަމަށެވެ. އަދި އޭނާ މަރުވެފައިވަނީ ހުޅުމާލޭ މެޑިކަލް ފެސިލިޓީގައި ފަރުވާދެމުންދަނިކޮށް މިރޭ 08:42 ހާއިރުކަމަށެވެ.
މިއަދު މެންދުރުވެސް ވަނީ ދިވެއްސަކު މި ބަލީގައި ދުނިޔެދޫކޮށްފައެވެ. މިއަދު ދެން މަރުވެފައިވަނީ އުމުރުން 73 އަހަރުގެ ދިވެހި އަންހެނެކެވެ. އެ މީހާއަކީ ދަރުމަވަންތަ ހޮސްޕިޓަލްގައި އެޑްމިޓްކޮށްގެން ފަރުވާދެމުން އައި މީހެކެވެ. މިއާއެކު ރާއްޖެއިން މި ބަލީގައި މަރުވި މީހުންގެ އަދަދު މިވަނީ 105 އަކަށް އަރާފައެވެ.
މިބަލީގައި ރޭވެސްވަނީ ދެ ދިވެހިން މަރުވެފައެވެ. މީގެ ތެރެއިން އެކަކީ ހުޅުމާލޭ މެޑިކަލް ފެސިލިޓީގައި ފަރުވާ ދެމުންދިޔަ 79 އަހަރުގެ އަންހެނެކެވެ. އަނެއް މީހަކީ އައިޖީއެމްއެޗްގެ އީއާރްއަށް ގެންދިޔަ 74 އަހަރުގެ ފިރިހެނެކެވެ. މިއީ ރާއްޖެއިން ކޮވިޑް ޖެހިގެން މަރުވި 103 ވަނަ މީހާއެވެ.
ރާއްޖެއިން ކޮވިޑް ޖެހިގެން މަރުވި 102 ވަނަ މީހާއަކީ ކުރީގެ ރައްޔިތުން މަޖިލީހުގެ ގައްދޫ ދާއިރާގެ މެންބަރު އަދި ވިޔަފާރިވެރިޔާ ޒާހިރު އާދަމް (ގައްދޫ ޒާހިރު) އެވެ. ޒާހިރަކީ ރިސޯޓް ވިޔަފާރީގެ އިތުރުން ސަފާރީގެ ވިޔަފާރިވެސް ކުރައްވާ އަދި މިހާރުވެސް އެ މަސައްކަތުގައި އުޅުއްވާ ބޭފުޅެކެވެ. އަދި ރައްޔިތުން މަޖިލީހުގައިވެސް ވަރަށް ހީވާގިކަމާއެކު މަސައްކަތް ކުރެއްވި މެންބަރެއްވެސް މެއެވެ. އަދި ޒާހިރު ވަނީ ކިޑްނީ ޓްރާންސްޕްލާންޓެއްވެސް ހަދާފައެވެ.
ރާއްޖޭގައި މި ފާއިތުވާ ހަފްތާއަކީ، އާދަޔާ ހިލާފަށް ކޮވިޑް ޖެހޭ މީހުންގެ އަދަދު މަތީ ހަފްތާއެކެވެ. ކޮންމެ ދުވަހެއްގެ އަދަދުތައް 1000 އިން މަތިން ދާ އިރު، ގިނައީ މާލެ ސަރަހައްދުން ޕޮޒިޓިވް ވާ މީހުންނެވެ. މާލެ ސަރަހައްދުގައި ކޮވިޑަށް ޓެސްޓް ކުރާ ކޮންމެ 3 މީހަކުން 1 އެއް ކޮވިޑަށް ޕޮޒިޓިވް ވެއެވެ.
