ސަރުކާރު އޮފީސް ތަކުގެ އިތުރުން އަމިއްލަ އޮފީސްތަކާއި ވިޔަފާރިތައް ބަންދުކޮށް އޮންލައިން ކޮށް މަސައްކަތް ކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގައިފިއެވެ.
އެޗްޕީއޭ އިން ބުނީ، ދިވެހިރާއްޖޭގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ސިއއްހަތް ރައްކާތެރި ކުރުމަށް އަޅަ ފިޔަވަޅުތަކުގެ ތެރޭގައި މާދަމާއިން ފެށިގެން ވަކި ގޮތެއް އަންގަންދެން މާލެ ސަރަހައްދު (މާލެއާއި ހުޅުމާލެއާއި، ވިލިނގިއްޔާއި، ތިލަފުށް ޓާއި، ގުޅީފަޅު) ގައި ހުންނަ ދައުލަތުގެ މުއައްސަސާތަކާއި އިދާރާތަކާއި އަމިއްލަ ވިޔަފާރި ކުންފުނިތަކާއި އޮފީސްތައް ބަންދުކުރަން އަންގާފައިވާ ކަމަށެވެ.
އެގޮތުން މުވައްޒަފުން އޮފީހަށް ހާޒި ރުވެގެން ކޮންމެހެން ނުކުމެގެން ކުރަންޖެހޭ ޒަރޫރީ ބޭނުންތައް ފިޔަވައި އެހެނިހެން މަސައްކަތް ގޭގައި ތިބެގެން ކުރާ ގޮތަށް ހަމަޖެއްސުމަށް އެޗްީއޭއިން ބުނެއެވެ. އަދި ބާއްވަންޖެހޭ ބައްދަލުވުންތައް އޮންލައިންކޮށްގެ ބޭއްވުމަށްވެސް އެ އެޖެންސީން އަންގާފައި ވެއެވެ.
އަދި ފިޔަވަޅުތައް ތަންފީޒު ކުރުމުގައި، ވަގުތާއި ހާލަތަށް ރިއާޔަތްކޮށް، އަޅަންޖެހޭ އެންމެހައި ފިޔަވަޅުތައް އަޅާނީ، ދިވެހި ފުލުހުންގެ ހިދުމަތުންނާއި ކަމާބެހޭ އެހެނިހެން މުއައްސަސާތަކުން ކަމަށް އެޗްޕީއޭއިން ބުނެއެވެ. އަދި މި ފިޔަވަޅުތައް ތަންފީޒުކޮށް، އެ ފިޔަވަޅުތަކަށް ފުރިހަމައަށް އަމަލުކުރުމަށް، އެންމެހައި އިދާރާތަކަށާއި ފަރާތްތަކަށް ވަނީ އަންގާފައެވެ.
މި އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރާންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އަމަލުކުރުމަށް ވެސް އެންމެހައި ފަރާތްތަކަށް އަންގާކަމަށް އެޗްޕީއޭއިން ބުނެއެވެ.
މި މަހުގެ 5 ވަނަ ދުވަހުން ފެށިގެން ކޮވިޑުން ރައްކާތެރިވުމަށް ސަރުކާރު އޮފީސްތަކުގެ މުވައްޒަފުން ގޭގައި ތިބެގެން މަސައްކަތް ކުރާ ގޮތަށް ވަނީ ހަމަޖައްސާފައެވެ. އަދި ސްކޫލަތަކުގެ ކުދިންވެސް ގޭގައި ތިބެގެން އޮންލައިންކޮށް ކިޔަވާ ގޮތަށް ވަނީ ހަަމަޖައްސާފައެވެ.
ކޮވިޑުން ރައްކާތެރިވުމަށް ފިޔަވަޅުތައް ވަރުގަދަ ކުރަމުން މި އަންނަނީ މިހާރު ރާއްޖޭގައި ކޭސްތައް އިތުރުވުމާއެކުއެވެ. މިއަދުވެސް ވަނީ 700 އިން މައްޗަށް ކޭސް ރިޕޯޓުކޮށްފައެވެ. އަދި މި ބަލީގައި މިއަދު އެކަނިވެސް ވަނީ 5 މީހަކު މަރުވެފައެވެ.
