ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ހަށިކޮޅަށް އަމާޒުކޮށް މިރޭ ދިން ހަމަލާގައި 3 ސިފައިންނަށް އަނިޔާވެފަވާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ މި ހާދިސާގައި އަނިޔާވި މީހުންގެ ތެރޭގައި ތިން ސިފައިން ހިމެނޭ ކަމަށެވެ. އޭގެތެރެއިން އެކަކު ގެންދިޔައީ އައިޖީއެމްއެޗްއަށް ކަމަށާއި އަނެއް ދެމީހުން ގެންދިޔައީ އޭޑީކޭ ހޮސްޕިޓަލަށް ކަމަށެވެ. އެ ހާދިސާގައި އަނިޔާވި ސިފައިންގެ 3 މީހުންގެ ތެރެއިން އައިޖިއެމްއެޗަށް ގެންދިޔަ ސިފައިންގެ މީހާ މިހާރު ދޫކޮށްލާފައިވާ ކަމަށެވެ. އެމީހާ އައިޖީއެމްއެޗަށް ގެންދިޔައީ ކަންފަތަށް ތަދުވާތީ ކަމަށް އެމްއެންޑީއެފުން ބުނެއެވެ.
އޭގެ އިތުރުން އޭޑީކޭއަށް ގެންދިޔަ 2 ސިފައިންނަށް ފަރުވާދެމުންދާ ކަމަށް ވެސް އެމްއެންޑީއެފުން ވަނީ ބުނެފައެވެ. އެ 2 ސިފައިންގެ ހާލު ރަނގަޅު ކަމަށް ވެސް ބުނެއެވެ.
އެމްއެންޑިއެފުން ބުނީ އެ 2 ސިފައިންގެ ހަށިގަނޑުގެ ބައެއް ތަންތަނަށް ކުދި އަނިޔާ ލިބިފައިވާ ކަމަށެވެ.
މި ހާދިސާގައި ރައީސް ނަޝިދަަށް އެކި ވަރުގެ އަނިޔާ ވަނީ ލިބިފައެވެ. ހަމައެއާއެކު އެ ސަރަހައްދުގައި ހުރި ބިދޭސީއަކަށް ވެސް ވަނީ އަނިޔާ ވެފައެވެ.
އެޑީކޭއިން ބުނީ ރައީސް ނަޝީދު ޒަހަމްތަކާއެކު އެ ހޮސްޕިޓަލަށް ގެންގޮސްފައި ވަނީ މިރޭ 8:30 ގައި ކަމަށެވެ. އަދި އެމަނިކުފާނަށް މިހާރު ޑޮކްޓަރުންގެ ޓީމެއް ދަނީ ފަރުވާ ދެމުން ކަމަށާއި މިވަގުތު ހާލު ސީރިއަސް ނޫން ކަމަށް އޭޑީކޭއިން ބުނެއެވެ.
އެހާދިސާއާ ގުޅިގެން އެމްއެންޑީއެފްގެ ސެކިޔުރިޓީ ވަރުގަދަކޮށް، އެލާޓް ސްޓޭޓަސް މަތިކޮށްފައެވެ. އަދި ފުލުހުންގެ ހިދުމަތުގެ އެލާޓް ލެވެލް، ލެވެލް 3 އަށް މަތިކޮަށް ބޮޑު އިސްކަމެއްދީގެން ތަހުގީގުގެ މަސައްކަތް ފަށާފައިވާ ކަމަށް ފުލުހުން ވަނީ ބުނެފައެވެ.
