3 މީހަކު ކޮވިޑް-19 އަށް ޕޮޒިޓިވްވެ، ހދ. ކުޅުދުއްފުށި މޮނިޓަރިން ހާލަތަށް ގެނެސްފިއެވެ.
ކުޅުދުއްފުށި ރީޖަނަލް ހޮސްޕިޓަލުން ބުނީ އެރަށުން ނެގި ތިން ފުލޫ ސާމްޕަލްއެއް ޕޮޒިޓިވް ވުމާ ގުޅިގެން ކުޅުދުއްފުށި މޮނިޓަރިންގެ ހާލަތަށް ގެނައުމަށް ނިންމާފައިވާ ކަމަށެވެ.
އެ ކޭސްއާ ގުޅުން ހުރި އިތުރު މީހުންގެ ސާމްޕަލްތައް ނަގާފައިވާ ކަމަށާއި ކޮންޓެކްޓް ޓްރޭސިންގެ މަސައްކަތް ކުރަމުންދާ ކަމަށް އެހޮސްޕިޓަލުން ވަނީ ބުނެފައެވެ.
ކުޅުދުއްފުށި ހޮސްޕިޓަލުން ވަނީ އެންމެން ވެސް ރައްކާތެރިކަމުގެ ފިޔަވަޅުތަކާއެކު އުޅުމަށް އިލްތިމާސް ކޮށްފައެވެ.
އެގޮތުން މާސްކު އެޅުމާއި، ސައިބޯނި ލައިގެން ގިނަ ގިނައިން އަތް ދޮވުމާއި، ގައިދުރުކަން ބެހެއްޓުމާއި، ކޮންމެހެން ދާން ޖެހޭ ތަންތަނަށް މެނުވީ ނުދިއުމާއި، ރޯގާގެ އަލާމާތްތައް ހުރި ނަމަ ލަސްނުކޮށް ސާމްޕަލް ނެގުމާއި އަދި އެހެނިހެން ރައްކާތެރިކަމުގެ ފިޔަވަޅުތަކާއެކު އުޅުމަށް ވަނީ އިލްތިމާސް ކޮށްފައެވެ.
މިދިޔަ މާޗްގައި ވެސް ކުޅުދުއްފުށި ވަނީ މޮނީޓަރިން ހާލަތަށް ގެނެސްފައެވެ. އެރަށް މޮނިޓަރިންއަށް ލީ ކުޅުދުއްފުށީ ހޮސްޕިޓަލުގައި އެޑްމިޓްކޮށްފައި އޮތް ބަލި ދެ މީހަކު ކޮވިޑަށް ޕޮޒިޓިވްވުމާ ގުޅިގެންނެވެ. ފޮޒިޓިވް ވެފައި ވަނީ ޅ. ނައިފަރު ހޮސްޕިޓަލުން އެ ހޮސްޕިޓަލަށް ގެންދިޔަ 2 މީހެކެވެ.
