ފުޓްސަލް މުބާރާތެއް ހުޓުވުމުން، ޒުވާނުންގެ ބަޔަކު ޑިރެކްޓަރު ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު މަގާމުން އިސްތިއުފާ ދެއްވުމަށް ގޮވާލާފިއެވެ.
ހުޅުމާލޭގައި ކުރިއަށްދާ އެލްއެފް ފުޓްސަލް ކަޕް 2021 ހުއްޓުވުމަށް ޔޫތު މިނިސްޓްރީން ފޮނުވި ސިޓީގައި ބުނެފައި ވަނީ މާލެ ސަރަހައްދުގައި ކޮވިޑް ކޭސްތައް އިތުރުވަމުންދާތީވެ، މުބާރާތް ވަގުތީ ގޮތުން މެދުކަނޑާލުމަށް އެދޭ ކަމަށެވެ.
ޒުވާނުން އެކަމާއި ނުރުހުން ފާޅުކުރުމަށް ރޭ މައިމޫނާ ދިރިއުޅުއްވާ ހުޅުމާލެ 128 ނަންބަރު ފްލެޓް ކައިރިއަށް އެއްވެ ވަނީ އަޑުއުފުލާ، އިސްތިއުފާ ދެއްވުމަށް ގޮވާލާފައެވެ. އަދި އަޑު އުފުލި ބައިވެރިން ވަނީ މުބާރާތް ހުއްޓުވާފަ ވަނީ ކުރިން އެންގުމަކާ ނުލާ ކަމަށް ބުނެފައެވެ.
މައުލޫމާތު ލިބިފައިވާ ގޮތުގައި އެ މުބާރާތުގައި 85 ޓީމުން ވަނީ ބައިވެރިވެފައެވެ.
އެކަމާ ގުޅިގެން "ދަ ޕްރެސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ ހުޅުމާލޭގައި މައިމޫނާ އުޅުއްވާ ފްލެޓް ކައިރީގައި ބަޔަކު މުޒަހަރާ ކުރުމާ ގުޅިގެން ފުލުހުން އެސަރަހައްދުގައި ހަރަކާތަތެރިވެ، އެސަރަހައްދުން އެމީހުން ފޮނުވާލާފައިވާ ކަމަށެވެ. އަދި އެތަނުން އެއްވެސް މީހަކު ހައްޔަރު ކޮށްފައި ނުވާ ކަމަށް ފުލުހުން ބުނެއެވެ.
އެކަމާ ގުޅިގެން ޓެންޑާ ބޯޑުގެ ޗެއާމަން އިސްމާއިލް ޒަރިޔަންދު ކުރެއްވި ޓްވީޓެއްގައި ވިދާޅުވީ އެޗްޕީއޭގެ ވެރިޔަކީ ސިވިލް ސާވަންޓެއް ކަމަށާއި ވަކި ގާނޫނެއްގައި ވަކި ސިވިލްސާވަންޓަކަށް ލިބިދީފައިވާ ބާރު ބޭނުންކުރާނީ ވެސް ސަރުކާރުގެ ވަޒީރެއްގެ އިރުޝާދުގެ ދަށުން ކަމަށެވެ. އަދި ސިޔާސީ ފަރާތްތަކަށް އަމަލުކުރާ އުސޫލުން ސިވިލްސާވަންޓުންނަށް އަމަލު ނުކުރުމަށް ޒަރިޔަންދު ވަނީ ޒުވާނުންގެ ކިބައިން އެދިފައެވެ.
ދުވަހުން ދުވަހަށް ކޭސްތައް އިތުރުވެފައިވާ އިރު، ދުވާލެއްގެ މައްޗަށް 300 އަށްވުރެ ގިނަ މީހުން މިހާރު ދަނީ ޕޮޒިޓިވްވަމުންނެވެ. ނަމަވެސް އެޗްޕީއޭއިން މާލެ ސަރަހައްދުގައި ފިޔަވަޅުތައް ހަރުކަށި ކުރުމަށް އަދި ނިންމައިފައެއް ނުވެއެވެ.
އެޗްޕީއޭ އިން އެކަށީގެންވާ ފިޔަވަޅުތަކެއް އަޅަމުން ނުދާތީ ގިނަ ބަޔަކުން އަންނަނީ ކަންބޮޑުވުން ވެސް ފާޅު ކުރަމުންނެވެ.
