އިސްރާއީލުގެ އިރުއުތުރުގެ ސަރަހައްދެއްގައި، ޔަހޫދީން ކުރިއަށް ގެންދިޔަ ދީނީ ހަރަކާތެއްގައި ހިނގި ފިތިބާރުވުމުގެ ހާދިސާއެއްގައި ގިނަ އަދަދެއްގެ ބަޔަކު މަރުވެއްޖެއެވެ.
އިސްރާއީލުގެ ނޭޝަނަލް އެމާޖެންސީ ސާވިސްއިން ވަނީ، މަރުވި މީހުންގެ އަދަދު ކަށަވަރު ކޮށްދިނުމަކާ ނުލާ، މިފަދަ ހާދިސާއެއް ހިނގައިގެން އުޅޭކަމަށް ބުނެފައެވެ. އަދި އިތުރު ބަޔަކަށް އެކި ވަރުގެ އަނިޔާތައް ލިބިފައި ވާ ކަމަށްވެސް އިސްރާއީލުގެ ނޭޝަނަލް އެމާޖެންސީ ސާވިސްއިން ހަބަރު ދެއެވެ.
އިސްރާއީލުގެ މީޑިއާއާ ހަވާލާދީ ބީބީސީއިން ރިޕޯޓް ކޮށްފައި ވާ ގޮތުގައި، މިހާދިސާގައި މަރުވި މީހުންގެ އަދަދު މިހާރު ވަނީ 44 އަށް އަރާފައެވެ.
ޔަހޫދީން ކުރިއަށް ގެންދިޔަ މި ހަރަކާތަކީ، ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމަށް ފަހު، އިސްރާއީލުގައި މިހާ ބޮޑު ކޮށް ފުރަތަމަ ފަހަރަށް ކުރިއަށް ގެންދިޔަ އާންމު އިވެންޓް ކަމަށް މައުލޫމާތު ލިބެއެވެ. މި ހަރަކާތުގައި އެތައް ހާސް މީހުންނެއް ބައިވެރިވިއެވެ.
ފިތިބާރުވެ، ފައިދަށުވުމުގެ ހާދިސާ ހިނގީ އިވެންޓްގައި ބައިވެރިވަމުން ދިޔަ ބަޔަކު، ސިޑިތައް މަތިން ކައްސާލި ހިސާބުންނެވެ. މަންޒަރު ދުށް މީހަކާ ހަވާލާދީ މީޑިއާ ރިޕޯޓްތައް ބުނާ ގޮތުގައި، ހާދިސާ ހިނގައިގެން ދިޔައީ މަދު ސިކުންތު ކޮޅެއްގެ ތެރޭގައެވެ.
