ވާދަވެރި ރިޔާސީ އިންތިހާބަކަށް ފަހު މިއަހަރުގެ ޖެނުއަރީ މަހު އެ ގައުމުގެ ވެރިކަމާ ހަވާލުވެވަޑައިގެންނެވި އެމެރިކާގެ ރައީސް ޖޯ ބައިޑަން، ގާނޫނު ހަދާ މަޖިލީހުގައި ފުރަތަމަ ފަހަރަށް ތަގުރީރު ކުރައްވައިފިއެވެ.
ގާނޫނު ހަދާ މަޖިލީހުގެ 2 ގޭގެ ގުޅިފައިވާ ބައްދަލުވުމެއްގައި ތަގުރީރު ކުރިއަށް ގެންދަވަމުން ބައިޑަން ވަނީ، އެތައް ހާސް ބައެއްގެ ފުރާނަ ދުއްވާލާ، އިގުތިސޯދީ ހަފުސް ކޮށްލި ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމަށް ފަހު، އެމެރިކާ އަނެއްކާވެސް "ކުރިއަށް ހިނގަން" ފަށާފައި ވާ ކަމަށް ވިދާޅުވެފައެވެ.
ވެރިކަމަށް 100 ދުވަސް ފުރިފައި ވާއިރު، އެމެރިކާ އަނެއްކާވެސް ކުރިއަށް ހިނގަން ފަށާފައި ވާ ކަމަށް ދަންނަވަން ކެރިވަޑައިގަންނަވާ ކަމަށް ބައިޑަން ވިދާޅުވިއެވެ. އަދި ކާރިސާތައް ފުރުސަތުތަކަށް، އިނދަޖެހުންތައް އިތުރު ހިތްވަރަކަށް ހަދަމުން އަންނަ ކަމަށްވެސް ބައިޑަން ވަނީ ސިފަކުރައްވާފައެވެ.
ސަރުކާރުގެ ފުރަތަމަ 100 ދުވަހުގެ ތެރޭގައި އޭނާގެ ސަރުކާރުން 1.3 މިލިއަން އާ ވާޒީފާ ހުޅުވާލި ކަން ބައިޑަން ފާހަގަ ކުރެއްވިއެވެ. މިއީ އެމެރިކާގެ ތާރީހު ދުށް އެއްވެސް ރައީސަކަށް، ފުރަތަމަ 100 ދުވަހުގެ ތެރޭގައި ހާސިލު ކުރެއްވުނު އަމާޒެއް ނޫނެވެ.
އޭނާގެ ސިޔާސަތުތަކާއެކު، މިއަހަރު، އެމެރިކާގެ އިގުތިސޯދު، 6 ޕަސެންޓަށް ވުރެ އިތުރަށް ކުރިއަރާނެ ކަމަށްވެސް ބައިޑަން ވަނީ ވިދާޅުވެފައެވެ.
ބައިޑަން ވަނީ ޗައިނާގެ ވާދަވެރި ކަމަށްވެސް މަރުހަބާ ވިދާޅުވެފައެވެ. އަދި ޗައިނާއާ ދެކޮޅަށް ކުރިމަތިލުމަކަށް ދިއުމަށް އެމެރިކާގެ ސަރުކާރުން ނޭދޭ ކަމަށްވެސް ބައިޑަން ވަނީ ވިދާޅުވެފައެވެ.
އަދި ރަޝިއާ ދެކޮޅު ކުރިމަތިލުމަކަށް ދިއުމަށްވެސް އެމެރިކާ ނޭދޭކަން ބައިޑަން ވަނީ ފާހަގަ ކުރައްވާފައެވެ.
ބައިޑަންގެ ތަގުރީރާ ވިދިގެން، އިދިކޮޅި ރިޕަބްލިކަން މެންބަރުން ވަނީ ރައްދު ތަގުރީރެއް ދެއްވާފައެވެ. ރިޕަބްލިކަން ޕާޓީގެ ފަރާތުން ރައްދު ތަގުރީރު ދެއްވީ، މަޖިލީހުގައި ހިމެނިވަޑައިގަންނަވަ ހަމައެކަނި އެފްރިކަން-އެމެރިކަން ސެނެޓާ، ޓިމް ސްކޮޓްއެވެ. އޭނާގެ ތަގުރީރުގައި ސްކޮޓް ވިދާޅުވީ، ބައިޑަންގެ ސަރުކާރުގައި އެމެރިކާ އިންތިހާއަށް ބައިބައިވެފައި ވާ ކަމަށެވެ. އަދި ކޮވިޑް-19ގެ ބަލިމަޑުކަމަށް ބައިޑަންގެ ސަރުކާރުން ދިން އިޖާބައަށްވެސް އޭނާ ވަނީ ފާޑުވިދާޅުވެފައެވެ.
