މިއަދު ރެކޯޑް އަދަދަކަށް މީހުން ކޮވިޑަށް ޕޮޒިޓިވް ވެއްޖެއެވެ. ވޭތުވެ ދިޔަ 24 ގަޑި އިރުގެ ތެރޭގައި 3289 ސާމްޕަލެއް ޓެސްޓް ކޮށްފައި ވާއިރު، މިއަދު 386 މީހަކު ކޮވިޑަށް ޕޮޒިޓިވް ވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެއެވެ.
އެޗްޕީއޭ އިން ބުނީ މިއަދު ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 105 މީހަކާއި، ހިންގަމުން ދާ ރިސޯޓުތަކުން 6 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 198 މީހެކެވެ.
މިއަދުގެ ކޮވިޑް އަޕްޑޭޓް
- މިއަދު ޕޮޒިޓިވްވި އަދަދު: 386
- ހޮސްޕިޓަލުގައި އެޑްމިޓް ކޮށްފައިވާ މީހުންގެ އަދަދު: 119
- ޕޮޒިޓިވްވި މީހުންގެ ޖުމްލަ އަދަދު: 28،588
- ކޮވިޑް އެކްޓިވް ކޭސް: 4009
- ބަލިން ރަނގަޅުވި މީހުންގެ ޖުމްލަ އަދަދު 24،499
- ކޮވިޑް މަރުގެ ޖުމްލަ އަދަދު: 71
އެޗްޕީއޭއިން ރެންޑަމް ސާމްޕަލް ނެގުން މިހާރު ވެސް މާލޭ އާއި އަތޮޅުތަކުގައި ކުރިއަށް ގެންދެއެވެ. އަދި ކޮވިޑް ކޭސްތަކެއް ފެނިގެން މިހާރު އަތޮޅު ތެރޭގެ 23 ރަށެއް ވަނީ މޮނިޓަރިންގެ ހާލަތުގައެވެ.
އޭގެތެރޭގައި ތ. އަތޮޅުން 6 ރަށް އަދި ކ. އަތޮޅުން 5 ރަށް ވަނީ މޮނިޓަރިން އަށް ލާފައެވެ. ތ. އަތޯލުން މޮނިޓަރިންއަށް ލާފައި ވަނީ ތިމަރަފުށީގެ އިތުރުން، ގާދިއްފުށި، މަޑިފުށި، އޮމަދޫ، ކިނިބިދޫ، ވޭމަންޑޫއެވެ. އަދި ކ. އަތޮޅުން ތުލުސްދޫ އާއި ހިންމަފުށި، މާފުށި، ގުޅި، ދިއްފުށި ވަނީ މޮނިޓަރިންއަށް ލާފައެވެ. މީގެ އިތުރުން މޮނިޓަރިންގައި ހުރި ރަށްރަށަކީ ހދ. ހަނިމާދޫ، ޅ. އަތޮޅުން ނައިފަރާއި ފެލިވަރު، އދ. އަތޮޅުން މާމިނގިލި، އއ. އަތޮޅުން ބޮޑުފޮޅުދޫ އާއި އުކުޅަސް އާއި މަތިވެރި، ބ. އޭދަފުށި، ލ. މާންދޫ، ގަން، ފޮނަދޫ އަދި ގދ. ތިނަދޫއެވެ.
މިއަދު 386 މީހުން ޕޮޒިޓިވްވި އިރު އިއްޔެ ވަނީ 328 މީހަކު ކޮވިޑަށް ޕޮޒިޓިވް ވެފައެވެ. މިދިޔަ އާދިއތަ ދުވަހު 253 މީހަކު ކޮވިޑް ޕޮޒިޓިވް ކޭސް ރިޕޯޓް ކޯށްފަިއ ވާއިރު ހޮނިހިރު ދުވަހު ވަނީ 218 ކޭސް ރިޕޯޓް ކޮށްފައެވެ. ހަމައެއާއެކު ހުކުރު ދުވަހު ވަނީ 318 ކޭސް ރިޕޯޓް ކޮށްފައެވެ.
ރޯދަ މަހު ލުއިތައް ދިނުމާއެކު މާލެ ސަރަަހައްދުގައި ގިނަ ބަޔަކު ހަވީރު ފިންޏަށް ބުރު ޖަހަން ނުކުމެ އުޅޭ އިރު މަޑި އެރުވުމަށް ކުޑަކުދިން ގޮވައިގެން ދަރުބާރުގެ ބިއްދޮށުގައި ވާ ހުސްބިމަށް ގިނަ ބަޔަކު ގޮސް އުޅޭ ތަން ފެނެއެވެ. އަދި ރެސްޓޯރަންޓް ތަކުގައި ރޯދަ ވީއްލުމަށް ބުކިން ހަދައިގެން ދާ މީހުން ވެސް އަންނަނީ މި ދަނޑިވަޅުގައި އިތުރު ވަމުންނެވެ.
