ދަތުރު ކުރާ މީހުންނަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ދޭ ހުއްދަ ދޫކުރުމުގައި ޓެކްނިކަލް މައްސަލަތަކެއް ދިމާވެއްޖެއެވެ.
އެ އެޖެންސީން ބުނީ، ސިސްޓަމުން ޓެކްނިކަލް މައްސަތަކެއް ދިމާވެގެން އުޅޭތީ ކައުންސިލުތައް މެދުވެރިކޮށް ރަށްރަށަށް ދަތުރުކުރާ މީހުންނަށް ދޭ ހުއްދަ ދޫ ކުރުމުގައި ހުރަސްތަކެއް ކުރިމަތިވަމުންދާ ކަމަށެވެ. މި މައްސަލައާ ހެދި ގިނަ ބަޔަކަށް ދަތިތައް ކުރިމަތިވަމުން ދާތީ އެކަމަށް ނިހާޔަތަށް މައާފަށް އެދޭ ކަމަށް އެޗްޕީއޭ އިން ބުނެއެވެ.
ރަށްރަށަށް މިދުވަސްކޮޅު ދަތުރު ކުރަމުންދާ މީހުން މި ވަނީ އިތުރުވެފައެވެ. މި ދުވަސްވަރު ގިނަ ބަޔަކު ރަށްރަށަށް ދަތުރު ކުރަމުންދަނީ ރާއްޖޭގައި ކޮވިޑްއިން ރައްކާތެރިވުމަށް ވެކްސިން ޖަހަމުންދާ އިރު އެކަމާ ގުޅިގެން ދޭން ފެށި ލުއިތަކާ ގުޅިގެންނެވެ.
އެ ގޮތުން މި މަހުގެ 20 ވަނަ ދުވަހުން ފެށިގެން އެޗްޕީއޭ އިން ވަނީ ވެކްސިންގެ ދެ ޑޯޒް ޖަހާފައިވާ މީހުންނަށް ވެކްސިން ޖެހިތާ 2 ހަފްތާ ވެފައިވާ ނަމަަ، ނެގެޓިވް ޕީސީއާރް ޓެސްޓަކާއެކު ކަރަންޓީން ނުވާ ގޮތަށް ރަށްރަށަށް ދަތުރު ކުރެވޭނެ ކަމަށް ބުނެފައެވެ.
ކަރަންޓީނު ނުވެ އެއްރަށުން އަނެއް ރަށަށް ދަތުރު ކުރުމުގައި ދީފައިވާ ލުއިތަކުގެ ތެރެއިން ޕީސީއާރް ޓެސްޓު ކުރިން ފައިސާ ދައްކައިގެން ހަދަން ޖެހުނު ނަމަވެސް މިހާރު މީހުންނަށް ފްލޫ ކްލިނިކްތަކުން ޕީސީއާރް ޓެސްޓް ހެދޭ ގޮތަށް ވެސް ވަނީ ހަމަޖައްސާފައެވެ.
