ކޮވިޑް ބަލީ ޖެހިގެން ހޮސްޕިޓަލުގައި ފަރުވާ ދެމުންދިޔަ ބަލި މީހަކު 4 މަހަށް ވުރެ ގިނަ ދުވަހު ހޮސްޕިޓަލުގައި އޮތުމަށް ފަހު ބަލިން ރަނގަޅުވެ ހޮސްޕިޓަލުން ދޫކޮށްލައިފިއެވެ.
އިންދިރާ ގާންދީ މެމޯރިއަލް ހޮސްޕިޓަލުގެ ނޭޝަނަލް ސެންޓާ ފޮ ރެސްޕިރޭޓަރީ މެޑިސިންގެ ފިޒީޝަން ޑރ މުހައްމަދު އަލީ ކުރެއްވި ޓްވީޓެއްގައި ވިދާޅުވީ، 4 މަސް ދުވަހު ހޮސްޕީތާލުގައި ފަރުވާ ދިނުމަށް ފަހު ކޮވިޑް ބަލީގައި ފަރުވާ ދެމުންދިޔަ ބަލި މީހަކު ދޫކޮށްލާފައިވާ ކަމަށެވެ. އެ ގޮތުން އެމީހާ ކޮވިޑް ޖެހިގެން ހޮސްޕިޓަލުގައި އެޑްމިޓް ކޮށްފައި ވަނީ މިދިޔަ ޑިސެމްބަރު މަހުގެ 5 ވަނަ ދުވަހުއެވެ. އަދި އެމީހާ ދޫކޮށްލާފައި ވަނީ މިދިޔަ ހުކުރު ދިވަހުއެވެ.
ޑރ. މުހައްމަދު އަލީ ވިދާޅުވީ، ހޮސްޕިޓަލުގައި ކޮވިޑް ބަލީގައި އެޑްމިޓް ކުރާ މީހުންނަށް ފަރުވާ ދިނުމުގައި ޑޮކްޓަރުިންނާއި ނަރުހުންނާއި، ޑައިޓިޝަނުންނާއި، ފިޒީޝަނުން، ރޭޑިއޮލޮޖިސްޓުން، ކާޑިއޮލޮޖިސްޓުން، މަސައްކަތު މީހުންގެ އިތުރުން ވެސް މަސައްކަތް ކުރި ހުރިހާ އެންމެން ވެސް ހިތްވަރާއެކު އެންމެ ފުރިހަމައަށް މަސައްކަތް ކޮށްފައިވާ ކަމަށެވެ. އެއީ މުޅި ޓީމް އެކުގައި ކުރި ރަނގަޅު މިންނަތް މަސައްކަތުގެ ފޮނި ނަތީޖާ ކަމަށާއި ބަލި މީހާއަކީ ވެސް ހިތްވަރުގަދަ މީހެއް ކަމަށް ޑރ. މުހައްމަދު އަލީ ވިދާޅުވިއެވެ.
އާއިލާގެ ފަރާތުން ވަނީ، "މަންމަ" އަށް ފަރުވާ ދިނުމުގައި މަސައްކަތް ކުރި ޑޮކްޓަރުންގެ ޓީމަށް ހާއްސަ ޝުކުރެއް އަދާ ކޮށްފައެވެ. މަންމަ ރަނގަޅު ވުމުގައި ޑޮކްޓަރުންގެ ރޯލް ވަރަށް މުހިންމު ކަމަށާއި އެކަމަށް އަބަދުވެސް ހިތުގެ ފުންމިނުން ޝުކުރު އަދާ ކުރާ ކަމަށް އެއާއިލާ މެންބަރަކު ބުނެއެވެ.
ކޮވިޑް ބަލީގައި ހޮސްޕިޓަލުގައި ފަރުވާ ދެމުންދާ އުމުރުން ދުވަސްވީ ގިނަ މީހުންނަކީ އެތައް މަހެއް ވަންދެން ހޮސްޕިޓަލުގައި ފަރުވާ ދޭން ޖެހޭ ބައެކެވެ. އެ މީހުންނަށް ފަރުވާ ދިނުމުގައި ރެއާ ދުވާލު ޑޮކްޓަރުންނާއި ނަރުހުން އަދި ސިއްހީ އެކި ދާއިރާގައި މަސައްކަތް ކުރާ މީހުން ދަނީ ބުރަ މަސައްކަތްތަކެއް ކުރަމުންނެވެ.
މިވަގުތު ރާއްޖޭގައި ކޮވިޑް ބަލި ޖެހިފައި ތިބި 3307 މީހަކު ތބި އިރު އޭގެތެރެއިން 101 މީހަކަށް ދަނީ ހޮސްޕިޓަލުގައި އެޑްމިޓްކޮށްގެން ފަރުވާ ދެމުންނެވެ.
