ބ. އޭދަފުށީގައި އުޅުމަށް ފަހު މި މަހުގެ 1 ވަނަ ދުވަހުގެ ފަހުން އެހެން ރަށަކަށް ދަތުރު ކޮށްފައިވާ މީހުން ކޮވިޑް ޓެސްޓު ކުރުމަށް އަންގައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ބ. އޭދަފުށިން ކޮވިޑް ޕޮޒިޓިވް ގިނަ ކޭސްތަކެއް ފެނިފައިވާތީ، މިމަހުގެ އެއްވަނަ ދުވަހުގެ ފަހުން ބ. އޭދަފުށީގައި އުޅުމަށްފަހު އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއް ނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް/ހެލްތް ސެންޓަރަށް އެންގުމަށެވެ.
އެ ތާރީހްގެ ފަހުން އޭދަފުއްޓަށް ގޮސްފައިވާ ފަރާތެއް ނަމަ، އޭދަފުށިން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށް އެޗްޕީއޭއިން ބުނެއެވެ. އަދި 10 ދުވަސް ހަމަވެފައިވާ ފަރާތްތަކުން ވެސް ސާމްޕަލް އެއް ނަގަައި ޓެސްޓް ކުރަން ވާނެ ކަމަށް އެޗްޕީޢޭއިން ބުނެއެވެ.
ހަމައެއާއެކު އޭދަފުށީން ދަތުރު ކުރި މީހަކު މިހާރު ހުރި ރަށެއްގެ ހެލްތު ސެންޓަރުން ނުވަތަ ހޮސްޕިޓަލުން ސާމްޕަލް ނެގުމުގެ އިންތިޒާމު ހަމަޖައްސަން ވާނެ ކަމަށް ވެސް އެޗްޕީއޭ އިން ބުނެއެވެ.
މި މަހުގެ އެއް ވަނަ ދުވަހުގެ ފަހުން އޭދަފުށިން މާލެއަށް އައިސްފައިވާ ފަރާތްތަކުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނެގުމަށް އެޗްޕީއޭއިން ބުނެއެވެ.
މި ފަރާތްތަކުން ސާމްޕަލް ނަގައި ލިބޭ ނަތީޖާ ނެގެޓިވްވި ކަމުގައި ވިޔަސް އޭދަފުށިން އެހެން ރަށަކަށް ދަތުރު ކުރި ދުވަހުން ފެށިގެން 10 ދުވަސް ވަންދެން ކަރަންޓީނުގައި ތިބުމަށާއި، އެރަށަށް ކުރި ދަތުރުގެ މައުލޫމާތު 1676 އަށް ހިއްސާ ކުރުމަށް އެޗްޕީއޭއިން ބުނެއެވެ.
އޭދަފުށިން ކޮވިޑް ކޭސްތަކެއް ފެނި އެ ރަށް މޮނިޓަރިންއަށް ލާފައި ވަނީ މި މަހުގެ 19 ވަނަ ދުވަހުއެވެ.
