ޔަހޫދީ އެކްޓިވިސްޓުންނާ، ފަލަސްތީނު ރައްޔިތުންނާ، އިސްރާއީލުގެ ފުލުހުންނާ ދެމެދު، އިރުމަތީ ގުދުސްގައި ހިންގި ނުރައްކަތެރި ކުރިމަތިލުންތަކުގައި، ގިނަ އަދަދެއްގެ ބަޔަކަށް އަނިޔާވެއްޖެއެވެ.
"އަރަބީން މަރަން" ހަރު އަޑުން ގޮވަމުން ދިޔަ އެތައް ސަތޭކަ ޔަހޫދިންނާ، ފަލަސްތީނުގެ މުޒާހަރާގެ ވައިވެރިން ކުރިމަތިލީ، އިރުމަތީ ގުދުސްގެ ބާބް އަލް-އަމޫދު ނުވަތަ ޑެމަސްކަސް ގޭޓް ސަރަހައްދުގައެވެ.
ހުޅަނގުގެ މީޑިއާއިން ރިޕޯޓް ކޮށްފައިވާ ގޮތުގައި، ދެ ބައިމީހުން ދުރުކުރުވުމަށް މަސައްކަތް ކުރަމުން ދިޔަ ފުލުހުން ވަނީ، މުޒާހަރާގެ ބައިވެރިންނާ ދެކޮޅަށް، ސްޓަން ގްރެނޭޑާ، ކަރުނަ ގޭހުގެ ބާރުގެ ބޭނުން ކޮށްފައެވެ. އަދި މުޒާހަރާގެ ބައިވެރިން ވަނީ، ފުޅިއާ އޮއްގާ އުކާފައި ކަމަށް ހަބަރު ލިބެއެވެ.
މި ކުރިމަތިލުންތަކާ ގުޅިގެން ގިނަ އަދަދެއްގެ ބަޔަކު ހައްޔަރު ކޮށްފައި ވާ ކަމަށްވެސް މައުލޫމާތު ލިބެއެވެ.
ޕަލަސްޓީނިއަން ރެޑް ކްރެސެންޓުން ބުނީ، ފަލަސްތީނުގެ 100 އެއްހާ މީހުންނަށް އަނިޔާ ވެފައި ވާ ކަމަށާ، 21 މީހަކަށް ހޮސްޕިޓަލުގައި ފަރުވާ ދޭން ޖެހުނު ކަމަށެވެ.
ފަލަސްތީނުގެ ރައްޔިތުން ވަނީ، އިރުމަތީ ގުދުސްގެ ބާބް އަލް-އަމޫދު ސަރަހައްދުގައި ރޯދަވީއްލުމުގެ ހަރަކާތް ކުރިއަށް ގެންދިއުމަށް ފުލުހުން ހުރަސް އަޅާފައި ވާ ކަމުގެ ޝަކުވާ ފެންމަތިކޮށްފައެވެ.
ޔަހޫދީންނާ ފަލަސްތީނުގެ ރައްޔިތުންނާ ދެމެދު، އިންތިހާ ނުތަނަވަސްކަން އުފެދެމުން އަންނަތާ ދުވަސްތަކެއް ވެއްޖެއެވެ.
