މިއަދު ވެސް ގިނަ އަދަދެއްގެ މީހުން ކޮވިޑަށް ޕޮޒިޓިވް ވެއްޖެއެވެ. މިއަދު 253 މީހަކު ކޮވިޑަށް ޕޮޒިޓިވް ވެފައި ވާކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެއެވެ.
ވޭތުވެ ދިޔަ 24 ގަޑިއިރުގެ އަދަދުތައް ހާމަ ކުރަމުން އެޗްޕީއޭ އިން ބުނީ މިއަދު ޕޮޒިޓިވް ވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވް ވި 111 މީހަކާއި، ހިންގަމުން ދާ ރިސޯޓުތަކުން 64 މީހަކާއި މީހުން ދިރިއުޅޭ ރަށްރަށުން ޕޮޒިޓިވްވި 61 މީހަކާއި އިންޑަސްޓްރިއަލް ޕޮޒިޓިވްވި 17 މީހެކެވެ.
މިއަދު ޕޮޒިޓިވްވި ޖުމްލަ އަދަދު 200 އިން މަތީގައި ހުރިއިރު ހޮސްޕިޓަލުގައި އެޑްމިޓް ކޮށްފައިވާ މީހުންގެ އަދަދު ވަނީ 83 އަށް އަރާފައެވެ. ޕޮޒިޓިވްވި މީހުންގެ ޖުމްލަ އަދަދު 26،920 އަށް އަރާފައި ވާއިރު ކޮވިޑް އެކްޓިވް ކޭސްގެ އަދަދު ވަނީ 2905 އަށް އަރާގައެވެ.
ބަލިން ރަނގަޅުވި މީހުންގެ ޖުމްލަ އަދަދު 23،935 އަށް އަރާފައި ވާއިރު ކޮވިޑްގައި މަރުގެ މީހުންގެ ޖުމްލަ އަދަދު ވަނީ 71 އަަށް އަރާފައެވެ. ވޭތުވެ ދިޔަ 24 ގަޑި އިރުގެ ތެރޭގައި 3286 ސާމްޕަލެއް ވަނީ ޓެސްޓް ކޮށްފައެވެ.
އެޗްޕީއޭއިން ރެންޑަމް ސާމްޕަލް ނެގުން މިހާރު ވެސް މާލޭ އާއި އަތޮޅުތަކުގައި ކުރިއަށް ގެންދެއެވެ. އަދި ކޮވިޑް ކޭސްތަކެއް ފެނިގެން މިހާރު އަތޮޅު ތެރޭގެ 18 ރަށެއް ވަނީ މޮނިޓަރިންގެ ހާލަތުގައެވެ. އޭގެތެރޭގައި ތ. އަތޮޅުން 7 ރަށް މޮނިޓަރިންއަށް ލާފައެވެ. އެއީ ތިމަރަފުށީގެ އިތުރުން، ގާދިއްފުށި، މަޑިފުށި، އޮމަދޫ، ކިނިބިދޫ، ވޭމަންޑޫ، އަދި ވިލިފުއްޓެވެ.
މީގެ އިތުރުން މޮނިޓަރިންގައި ހުރި ރަށްރަށަކީ ކ. އަތޮޅުން ހުރާ އާއި ހިންމަފުށި، މާފުށި، ގުޅި، ދިއްފުށު، ޅ. އަތޮޅުން ނައިފަރާއި ފެލިވަރާއި ހިންނަވަރު، އދ. އަތޮޅުން މާމިނގިލި، ބ. އޭދަފުށި، އއ. ބޮޑުފޮޅުދޫ އާއި މަތިވެރިއެވެ.
ރޯދަ މަހު ލުއިތައް ދިނުމާއެކު މާލެ ސަރަަހއްދުގައި ގިނަ ބަޔަކު ހަވީރު ފިންޏަށް ބުރު ޖަހަން ނުކުމެ އުޅޭ އިރު މަޑި އެރުވުމަށް ކުޑަކުދިން ގޮވައިގެން ދަރުބާރުގެ ބިއްދޮށޫގައިވާ ހުސްބިމަށް ގިނަ ބަޔަކު ގިސް އުޅޭ ތަން ފެނެއެވެ. އަދި ރެސްޓޯރަންޓްތަކުގައި ރޯދަ ވީއްލުމަށް ބުކިން ހަދައިގެން ދާ މީހުން ވެސް އަންނަނީ މި ދަނޑިވަޅުގައި އިތުރު ވަމުންނެވެ.
